Shavkat Mirziyoyev 9-iyun kuni Yaponiya bosh vaziri Fumio Kisida bilan telefon orqali muloqot qildi. Bu haqda Prezident matbuot xizmati xabar qildi.
Qayd etilishicha, ko‘p qirrali O‘zbekiston—Yaponiya hamkorligini rivojlantirish va kengaytirishga doir, shuningdek, xalqaro va mintaqaviy ahamiyatga molik dolzarb masalalar ko‘rib chiqilgan. Yetakchilar mamlakatlar o‘rtasida diplomatik munosabatlar o‘rnatilganining 30 yilligi hamda O‘zbekiston bilan Yaponiya o‘rtasidagi strategik sheriklikning 20 yilligi bilan bir-birini qutlagan.
Davlat rahbari Yaponiya bosh vaziri va hukumatiga O‘zbekistonda amalga oshirilayotgan islohotlarni qo‘llab-quvvatlayotgani uchun minnatdorlik bildirgan. Yaponiyaning JICA agentligi va Xalqaro hamkorlik banki – JABIC doirasida ko‘rsatilgan moliyaviy va moliyaviy-texnik ko‘mak hajmi 7 milliard dollardan oshgani ta’kidlangan.
Bundan tashqari, hukumat delegatsiyalarining joriy yilda o‘tkazilgan sermahsul uchrashuv va muzokaralarining natijalari yuqori baholangan. Yetakchilar innovatsiyalar, “yashil” iqtisodiyot, raqamli texnologiyalar, fan va ta’lim sohalarida amaliy hamkorlikni yanada kengaytirish va loyihalarni ilgari surish, madaniy-gumanitar almashinuv dasturlari va parlamentlararo muloqotni davom ettirish muhimligini qayd etgan. Osaka shahrida o‘tkaziladigan “EKSPO-2025” butunjahon ko‘rgazmasida O‘zbekistonning keng miqyosli ekspozitsiyasini tashkil etishga kelishib olingan.
Muloqot chog‘ida xalqaro kun tartibidagi masalalarga ham to‘xtalib o‘tilgan.
Yaponiya Bosh vaziri mamlakat BMT Xavfsizlik kengashiga doimiy a’zo bo‘lishi, Koreya yarim orolini yadroviy quroldan xoli hududga aylantirish va o‘g‘irlangan yapon fuqarolarini qaytarish masalalarida O‘zbekiston muttasil qo‘llab-quvvatlayotgani uchun minnatdorlik bildirgan.
O‘zbekiston prezidenti Yaponiya tomonini Kumamoto shahrida Suv sammiti muvaffaqiyatli o‘tkazilgani bilan tabriklagan hamda Yaponiya hukumati rahbari tomonidan mintaqada barqaror taraqqiyot va ravnaqqa erishish maqsadida ilgari surilgan Osiyoda amaliy hamkorlikning ustuvor yo‘nalishlarini qo‘llab-quvvatlashini bildirgan. Bosh vazir Fumio Kisida, o‘z navbatida, O‘zbekistonning Markaziy Osiyoda ishonch, yaxshi qo‘shnichilik va keng ko‘lamli sheriklik munosabatlarini mustahkamlash borasidagi tashabbuslarini hamda Afg‘onistonda bardavom tinchlik va iqtisodiy tiklanishni ta’minlashga ko‘rsatayotgan ko‘magini yuqori baholagan.
“Markaziy Osiyo + Yaponiya” muloqoti doirasida o‘zaro manfaatli hamkorlikning butun salohiyatini ishga solishdan ikkala tomon ham manfaatdor ekani qayd etilgan. Suhbat yakunida Shavkat Mirziyoyev bosh vazir Fumio Kisidani mamlakatga rasmiy tashrif bilan kelishga taklif qilgan.
Izoh (0)