DXX xodimlari tomonidan Samarqand, Farg‘ona, Andijon va Namangan viloyatlarida o‘tkazilgan tezkor tadbirlar davomida giyohvand moddalar savdosiga chek qo‘yildi. Bu haqda “O‘zbekiston 24” telekanali orqali efirga uzatilgan lavhada ma’lum qilindi.
DXX Samarqand viloyati bo‘yicha boshqarmasi xodimlari tomonidan viloyat IIB xodimlari bilan hamkorlikda o‘tkazilgan tezkor tadbirda Samarqand va Navoiy viloyatlarini bog‘lovchi “Samarqand” muntazam YPX maskanida Ishtixon tumanida yashovchi 40 yoshli shaxs boshqaruvidagi Nexia rusumli avtomashina to‘xtatilib, ko‘zdan kechirilgan.
Natijada uning salon qismida 2 kilogramm 27 gramm opiy moddasi borligi aniqlanib, protsessual tartibda rasmiylashtirib olindi. Aniqlanishicha, Tojikistondan kontrabanda yo‘li bilan olib kelingan ushbu narkotik moddalarni qonunbuzar sotish maqsadida Xorazm viloyatiga olib ketayotgan bo‘lgan.
Boshqa bir holatda esa ko‘p bosqichli tezkor tadbir o‘tkazilib, dastlab Samarqand shahridagi “Cho‘pon ota” YPX maskanida to‘xtatilgan avtomashinada yo‘lovchi sifatida ketayotgan, Bekobod shahrida yashovchi ikki nafar fuqaroning (1982 va 1996-yillarda tug‘ilgan) yonida 984 gramm “gashish” moddasi borligi aniqlanib, tegishli tartibda rasmiylashtirib olingan.
So‘ngra Bulung‘ur tumanidagi “Yuqori nuqta” YPX maskanida ularning sherigi, Bekobod shahrida yashovchi, muqaddam 3 marotaba sudlangan shaxs (1995-yilda tug‘ilgan) o‘zining Nexia rusumli avtomashinasida 989 gramm gashish moddasini olib ketayotgan vaqtida ushlangan.
Shuningdek, ushbu giyohvandlik vositalarini Tojikistondan olib kelib, sotilishini yo‘lga qo‘ygan Bekobod shahrida yashovchi 27 yoshli guruh tashkilotchisi ham Samarqand viloyatida qo‘lga olingan.
Bu yo‘nalishda DXX Farg‘ona va Andijon viloyatlari bo‘yicha boshqarmalari xodimlari tomonidan ham boshqa huquqni muhofaza qiluvchi idoralar bilan hamkorlikda tezkor tadbirlar o‘tkazilgan. Jumladan, Quva tumanida yashovchi 31 yoshli muqaddam sudlangan fuqaro kelgusida sotish maqsadida sherigi, Andijon shahrida yashovchi shaxsga 1 kilogramm 986 gramm gashish moddasini bergan vaqtida, ularning ikkalasi ham qo‘lga olingan.
Aniqlanishicha, giyohvandlik moddasini Qirg‘iziston fuqarosidan 5 ming dollarga sotib olinib, aylanma yo‘llar orqali Quva tumaniga olib kelingan.
Shuningdek, Beshariq tumanida yashovchi 28 yoshli shaxs tojikistonlik narkosavdogardan 5 ming dollar sotib olingan 940 gramm opiy moddasini kontrabanda yo‘li bilan Qo‘qon shahriga olib kelib, muqaddam sudlangan ikki nafar xaridorga (1977 va 1979-yillarda tug‘ilgan) sotayotgan vaqtida ularning barchasi qo‘lga olingan.
Qo‘qon shahrida kuzatilgan holatda esa 35 yoshli muqaddam sudlangan shaxs 826 dona “Regapen” va 80 dona “Tropikamid” kuchli ta’sir qiluvchi dori vositalarini 2 ming dollarga sotayotgan vaqtida ushlangan.
DXX Namangan viloyati bo‘yicha boshqarmasi hamda viloyat bojxona boshqarmasi xodimlari tomonidan o‘tkazilgan tezkor tadbirda Namangan—Toshkent yo‘nalishida harakatlanayotgan Nexia rusumli avtomashina Pop tumanidagi “Namangan” muntazam YPX maskanida to‘xtatilgan.
Avtomashina xolislar ishtirokida ko‘zdan kechirilganda, unda yo‘lovchi sifatida ketayotgan, Toshkent shahrida yashovchi 33 yoshli fuqaroning yonida 2237 dona “Regapen”, 400 dona “Selofen” va 300 dona “Tropikamid” kuchli ta’sir qiluvchi dori vositalari borligi aniqlanib, protsessual tartibda rasmiylashtirib olingan.
Aniqlanishicha, qirg‘izistonlik fuqaro tomonidan davlat chegarasidan aylanma yo‘llar orqali Uchqo‘rg‘on tumani hududiga o‘tkazib berilgan ushbu dori vositalari Toshkent shahrida sotilishi rejalashtirilgan.
Hozirda barcha holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
Avvalroq Samarqandda 2 kilo opiyni 30 ming dollarga sotishga uringan Tojikiston fuqarosi qo‘lga olingani, Surxondaryoda 20 kg opiyni 140 ming dollarga sotishga uringan shaxs ushlangani, O‘zbekistonda Tojikistondan keltirgan giyohvand moddalarni sotish bilan shug‘ullangan shaxslar qo‘lga olingani to‘g‘risida xabar berilgandi.
Izoh (0)