Qozog‘istonda veyplar taqiqlanib, IQOS va Glo aksiz solig‘iga tortiladi

Qozog‘istonda veyp sotish va chekish taqiqlanadi. Bu haqda deputat Amanjan Jamalov parlament majlisida ma’lum qildi, deb yozadi “Forbes.kz”.

Qozog‘istonda veyp sotish va foydalanishni taqiqlovchi tuzatishlar kiritishga qaror qilindi. Chekish aralashmasi, suyuqligi, gazini Qozog‘istonda sotish va iste’mol qilish butunlay taqiqlanadi. Shuning uchun bu tushunchalar Soliq kodeksidan olib tashlandi, — dedi deputat.

Shu bilan birga, “Fuqarolar salomatligi va sog‘liqni saqlash tizimi to‘g‘risida”gi kodeksga veypni sotish va undan foydalanishni taqiqlovchi o‘zgartirishlar kiritiladi.

Bundan tashqari, tamakini qizdirish tizimlari — IQOS va Glo soliqqa tortiladi.

Bugun deputatlar ularga aksiz solig‘ini joriy etishga qaror qildi. Ularga oddiy sigaretlarga solinadigan aksiz solig‘ining 70 foizi miqdorida aksiz solig‘ini joriy etish to‘g‘risida qaror qabul qilindi, — dedi parlament a’zosi.

Avvalroq chilim, sigaret, veyp, IQOS tizimlari, chekishning har qanday turi zarar ekanligi haqida xabar berilgan edi.