Қозоғистонда вейплар тақиқланиб, IQOS ва Glo акциз солиғига тортилади

Қозоғистонда вейп сотиш ва чекиш тақиқланади. Бу ҳақда депутат Аманжан Жамалов парламент мажлисида маълум қилди, деб ёзади «Forbes.кз».

Қозоғистонда вейп сотиш ва фойдаланишни тақиқловчи тузатишлар киритишга қарор қилинди. Чекиш аралашмаси, суюқлиги, газини Қозоғистонда сотиш ва истеъмол қилиш бутунлай тақиқланади. Шунинг учун бу тушунчалар Солиқ кодексидан олиб ташланди, — деди депутат.

Шу билан бирга, «Фуқаролар саломатлиги ва соғлиқни сақлаш тизими тўғрисида»ги кодексга вейпни сотиш ва ундан фойдаланишни тақиқловчи ўзгартиришлар киритилади.

Бундан ташқари, тамакини қиздириш тизимлари — IQOS ва Glo солиққа тортилади.

Бугун депутатлар уларга акциз солиғини жорий этишга қарор қилди. Уларга оддий сигаретларга солинадиган акциз солиғининг 70 фоизи миқдорида акциз солиғини жорий этиш тўғрисида қарор қабул қилинди, — деди парламент аъзоси.

Аввалроқ чилим, сигарет, вейп, IQOS тизимлари, чекишнинг ҳар қандай тури зарар эканлиги ҳақида хабар берилган эди.