Farg‘ona viloyati Yozyovon tumanida OITS infeksiyasini qasddan yuqtirishda gumonlangan ayol qo‘lga olindi. Bu haqda viloyat Ichki ishlar boshqarmasi xabar qildi.
Qayd etilishicha, Farg‘ona viloyati va Yozyovon tumani IIB xodimlari hamkorlikda tezkor tadbir o‘tkazgan. Jarayon davomida Yozyovon tumanida yashovchi M.A. ismli ayol yashash xonadonida erkak va M.X. ismli ayolning jinsiy ehtiyojlarini qondirishi uchun sharoit yaratib bergani aniqlangan. U xizmati evaziga 150 ming so‘m pul olgan.
Holat yuzasidan IIB xodimlari tomonidan o‘rganish olib borilgan. Natijada M.X. ismli ayol 2016-yildan buyon OITSga qarshi kurashish markazida “D” nazoratda bo‘lib, OIV infeksiyasiga chalinganini bilib turib, betartib jinsiy hayot kechirib yurgani ma’lum bo‘lgan.
Hozirda fuqaro M.A.ga nisbatan Jinoyat kodeksining 131-moddasi (qo‘shmachilik qilish yoki fohishaxona saqlash) 1-qismi bilan, M.X.ga nisbatan esa 113-moddaning 4-qismi (bila turib, boshqa shaxsni OIV kasalligi/OITSni yuqtirish xavfi ostida qoldirish yoki unga OIV kasalligi/OITSni yuqtirish) bilan ayb e’lon qilingan. M.X protsessual tartibda ushlangan.
Eslatib o‘tamiz, bugungi kunda respublikada 45 ming nafar odam OITS bilan yashab kelmoqda. Ularning 55 foizi erkaklar, 45 foizi ayollar, 14 foizini esa 18 yoshga to‘lmagan bolalar tashkil etadi. Respublika OITSga qarshi kurash markazi direktori o‘rinbosari Gulifor Normurodova 10 yillik ma’lumotlarga ko‘ra, ushbu kasallikka chalingan bolalar yildan yilga kamayib borayotganini aytgan edi.
Izoh (0)