Фарғона вилояти Ёзёвон туманида ОИТС инфекциясини қасддан юқтиришда гумонланган аёл қўлга олинди. Бу ҳақда вилоят Ички ишлар бошқармаси хабар қилди.
Қайд этилишича, Фарғона вилояти ва Ёзёвон тумани ИИБ ходимлари ҳамкорликда тезкор тадбир ўтказган. Жараён давомида Ёзёвон туманида яшовчи М.А. исмли аёл яшаш хонадонида эркак ва М.Х. исмли аёлнинг жинсий эҳтиёжларини қондириши учун шароит яратиб бергани аниқланган. У хизмати эвазига 150 минг сўм пул олган.
Ҳолат юзасидан ИИБ ходимлари томонидан ўрганиш олиб борилган. Натижада М.Х. исмли аёл 2016 йилдан буён ОИТСга қарши курашиш марказида «Д» назоратда бўлиб, ОИВ инфекциясига чалинганини билиб туриб, бетартиб жинсий ҳаёт кечириб юргани маълум бўлган.
Ҳозирда фуқаро М.А.га нисбатан Жиноят кодексининг 131-моддаси (қўшмачилик қилиш ёки фоҳишахона сақлаш) 1-қисми билан, М.Х.га нисбатан эса 113-модданинг 4-қисми (била туриб, бошқа шахсни ОИВ касаллиги/ОИТСни юқтириш хавфи остида қолдириш ёки унга ОИВ касаллиги/ОИТСни юқтириш) билан айб эълон қилинган. М.Х процессуал тартибда ушланган.
Эслатиб ўтамиз, бугунги кунда республикада 45 минг нафар одам ОИТС билан яшаб келмоқда. Уларнинг 55 фоизи эркаклар, 45 фоизи аёллар, 14 фоизини эса 18 ёшга тўлмаган болалар ташкил этади. Республика ОИТСга қарши кураш маркази директори ўринбосари Гулифор Нормуродова 10 йиллик маълумотларга кўра, ушбу касалликка чалинган болалар йилдан йилга камайиб бораётганини айтган эди.
Изоҳ (0)