Turk lirasi qulashda davom etmoqda — yil boshidan beri 22 foizga o‘z qiymatini yo‘qotdi

Turkiya lirasi dekabr oyidan beri birinchi marta bir dollar uchun 17 liradan oshib ketdi. Bu haqda Bloomberg xabar bermoqda.

Chorshanba, 8-iyun kuni lira bir dollar uchun 2 foizga tushib, 17,1048 lirani tashkil etdi. Yil boshidan beri turk lirasi 22 foizga o‘z qiymatini yo‘qotdi. Bu esa rivojlanayotgan bozorlardagi eng yomon ko‘rsatkichdir. 

Turkiya valyutasi ketma-ket 10 yil davomida pasayib bormoqda. Yillik inflyatsiya allaqachon 73,5 foizga yetdi, bu 1998-yildan beri eng yuqori ko‘rsatkichdir.

Turkiya Markaziy banki so‘ngi beshta yig‘ilishda asosiy stavkani o‘zgarishsiz qoldirdi. Buning oqibatida mamlakat hozirda inflyatsiyaga moslashtirilgan dunyodagi eng chuqur salbiy stavkaga ega bo‘lib turibdi. 

Biroq prezident Erdo‘g‘on stavkalarni tushirishga va’da berdi. Bu esa mamlakatdagi inflyatsiyaga bo‘lgan xavotirlarni kuchaytirmoqda.

Avvalroq may oyida so‘m 1,8 foizga qadrsizlangani haqida xabar berilgan edi.