Turizm va madaniy meros vazirligi ichki turizm xarajatlarini qoplash uchun subsidiya olish to‘g‘risidagi arizalar qabuli davom etayotganini ma’lum qildi.
Subsidiya sayohat tashkilotchisining mahalliy turistlarga O‘zbekiston bo‘ylab tashkil etilgan sayohatlarning transport chiptalari hamda mehmonxona xizmatlari xarajatlarining bir qismini qoplash uchun taqdim etiladi.
Subsidiya olmoqchi bo‘lganlar har oy yakuni bilan keyingi oyning 15-sanasidan kechiktirmay ariza bilan yozma yoki elektron shaklda Turizm va madaniy meros vazirligiga murojaat qilishi mumkin.
Arizaga (ariza namunasi) quyidagi hujjatlar ilova qilinadi:
- ariza beruvchining nomi, joylashgan joyi (pochta manzili), STIR va xizmat ko‘rsatuvchi bankdagi hisobraqami rekvizitlari to‘g‘risidagi ma’lumotlar;
- avia va temiryo‘l chiptalari uchun to‘lov amalga oshirilganligini tasdiqlovchi hujjatlar nusxalari;
- sayohat tashkilotchilari tomonidan joylashtirish vositalarida mahalliy turistlarga ko‘rsatilgan xizmatlar uchun tuzilgan shartnomalar bo‘yicha to‘lov amalga oshirilganligini tasdiqlovchi hujjatlar;
- turistik vaucherlarning nusxalari va boshqalar.
Subsidiya olish uchun kelib tushgan arizalarni ko‘rib chiqishning oxirgi kuni oyning 15-sanasi hisoblanadi.
Shu sababdan sayohat tashkilotchilarining may oyidagi xarajatlari qoplanishi to‘g‘risidagi arizalar iyun oyining 15-sanasigacha qabul qilinishi ma’lum qilinadi.
Turizm va madaniy meros vazirligi tomonidan 2021-yil may oyidan shu kunga qadar 72 ta ariza qanoatlantirilgan bo‘lib, mehmonxona va transport xarajatlari uchun jami 530 mln so‘m miqdorda subsidiyalar ajratilgan.
Avvalroq O‘zbekistonda ichki turizmni rivojlantirishga mas’ul tashkilotlar belgilangani haqida xabar berilgan edi.
Izoh (0)