Orolbo‘yi arxitektor va quruvchilari ekologik loyihalash bo‘yicha o‘qitiladi

8-iyun kuni BMTning Taraqqiyot dasturi (BMTTD) Iqtisodiy taraqqiyot va kambag‘allikni qisqartirish vazirligi hamda Islom taraqqiyot banki (ITB)ning Orolbo‘yi mintaqasidagi infratuzilmani boshqarish bo‘yicha qishloq aholining salohiyatini mustahkamlashga qaratilgan yangi qo‘shma tashabbusni boshladi.

BMTTD matbuot xizmatining “Daryo”ga ma’lum qilishicha, ushbu loyiha ITB va OPEK (OPEC Fund) xalqaro rivojlanish fondi tomonidan moliyalashtiriladigan O‘zbekistonning qishloq hududlarini barqaror rivojlantirish bo‘yicha yanada kengroq investitsiya loyihasining bir qismidir. Uni amalga oshirish uchun 5 million AQSH dollari miqdorida mablag‘ ajratildi.

Xususan, loyiha maqsadli hamjamiyatlarning mahalliy aholi ehtiyojlari va talablarini aniqlash, shuningdek, chora-tadbirlar rejalarini ishlab chiqish bo‘yicha salohiyatini kuchaytirishi rejalashtirilgan.Bundan tashqari, loyiha raqamlashtirish, innovatsion IT-yechimlarini, shu jumladan raqamli infratuzilma va qurilish, arxitekturaviy loyihalash va davlat xizmatlarini taqdim etish sohalari salohiyatini kengaytirishga xizmat qiladigan axborot tizimlarini ishlab chiqish orqali, mahalliy boshqaruv mexanizmini kuchaytirish hamda qishloq joylarini rivojlantirish dasturlari va tashabbuslarini rejalashtirish va amalga oshirishda jamoatchilik ishtirokini mustahkamlash chora-tadbirlarini ko‘zda tutadi.

Nima uchun aynan Orolbo‘yi mintaqasi?

Orolbo‘yi mintaqasi Orol dengizi qurishi va iqlim o‘zgarishi oqibatidagi salbiy ta’sirni o‘zida his etgan eng zaif mintaqa bo‘lib, bu Orolbo‘yi aholisi turmush darajasiga ta’sir etuvchi qator ijtimoiy-iqtisodiy va ekologik muammolarni keltirib chiqardi. Iqlim o‘zgarishi Orol dengizi fojiasidan jabr ko‘rgan hududlarda inson taraqqiyotiga qo‘shimcha va tobora ortib borayotgan muammolarni keltirib chiqarmoqda, bu yerda daromadlarning pastligi, yer va suv resurslarining sho‘rlanishining kuchayishi, oziq-ovqat xavfsizligining mavjud emasligi, chang bo‘ronlari ta’siri, ichimlik suvi sifati va mahalliy aholi salomatligining yomonlashuvi ko‘pchilikni og‘ir hayot sharoitlariga chidashga yoki mintaqani tark etishga majbur qilmoqda.

BMTTDning yangi loyihasi aynan Orolbo‘yi hududiga kiruvchi viloyatlarni, jumladan, ekologik inqirozga ko‘proq moyil bo‘lgan Qoraqalpog‘iston Respublikasi, Xorazm, Navoiy va Buxoro viloyatlarini qamrab oladi.

Umuman olganda, BMTTD tomonidan amalga oshiriladigan yangi loyiha hamjamiyatlarga qurilish va investitsiya loyihalarini amalga oshirish uchun asos bo‘ladigan jamoalarni rivojlantirish rejalarini ishlab chiqish orqali rivojlanish, ehtiyojlar ustuvorligini belgilash imkonini beradi.

Shuningdek, qurilish va arxitekturaviy rejalashtirishda yashil va innovatsion texnologiyalarni joriy etish yangi zamonaviy talablarga javob beradigan va ayni paytda energiyadan oqilona foydalanish imkonini beruvchi infratuzilma obyektlarini qurish imkonini beradi. Suv va energiya tejamkor, yangi qishloq xo‘jaligi texnologiyalari, past GIP (global isish potensiali)ga ega bo‘lgan ozon uchun xavfsiz texnologiyalarni turli sohalarda/turli maqsadlar uchun muvozanatga rioya qilgan holda tatbiq etish bo‘yicha ishlar amalga oshiriladi.

“Ushbu loyiha Orolbo‘yi aholisining turmush faoliyatini yaxshilash va qishloq aholisi uchun resurslar va xizmatlardan munosib foydalanishni ta’minlashga qaratilgan aniq qarorlarni amalga oshirish borasida hukumat, Islom taraqqiyot banki va BMTTD sa’y-harakatlarini birlashtirish uchun ajoyib imkoniyat bo‘ladi”, — deb ta’kidlagan BMTTDning O‘zbekistondagi doimiy vakili Matilda Dimovska.