FIFA World Cup Trophy Tour loyihasi doirasida futbol bo‘yicha Jahon kubogi O‘zbekistonga olib kelindi.
5-iyun kuni kubok ortilgan reys Livan poytaxti Bayrutdan Toshkent xalqaro aeroportiga kelib qo‘ndi. Coca-Cola tashkil etilgan FIFA World Cup™ xalqaro kubok-turi rasmiy kutib olish marosimida Toshkent shahar hokimi Jahongir Ortiqxo‘jayev, Sportni rivojlantirish vaziri Adham Ikromov va O‘FA birinchi vitse-prezidenti Ravshan Ermatov ishtirok etdi.
Ta’kidlab o‘tish lozimki, 2022-yil o‘zbek futboli uchun katta ahamiyat kasb etadi. Chunki bu yil ko‘plab muxlislarni ruhlantiradigan va quvonchiga sabab bo‘ladigan futbol yurtimizga kirib kelganining 110 yilligi nishonlanmoqda.
6-iyun kuni esa FIFA World Cup Trophy Tour by Coca-Cola loyihasi doirasida Toshkentda bir nechta tadbirlar bo‘lib o‘tdi. Ularda Jahon chempionlari Kristian Karambyo va Karles Puyol ishtirok etdi.
Avval mehmonlar Jahon chempionati kubogini o‘zbekistonlik yosh futbolchilarga namoyish etish va master-klass o‘tkazish uchun “Bunyodkor” akademiyasi stadioniga borishdi. Futbol afsonalari Kristian Karambyo va Karles Puyol yoshlarimiz bilan suhbatlashib, ular bilan birgalikda futbol o‘ynadi. Uchrashuvni sobiq FIFA referisi, O‘FA birinchi vitse-prezidenti Ravshan Ermatov boshqardi. So‘ngra Tashkent City Congress Hall’da kunning asosiy tadbiri, Coca-Cola tomonidan O‘zbekistonga olib kelingan futbol bo‘yicha Jahon chempionati kubogining ommaviy namoyishi bo‘lib o‘tdi.
4000 nafardan ziyod kishi futbol tarixidagi eng buyuk timsol oldida turib, u bilan suratga tushish imkoniyatiga ega bo‘lishdi. Coca-Cola kompaniyasining O‘zbekistondagi vakolatxonasi rahbari Murat Serkan Dilek Jahon kubogini O‘zbekistonga olib kelishdan asosiy maqsad, mamlakatda bo‘layotgan islohotlarni qo‘llab-quvvatlash va O‘zbekistonning jahon arenasidagi imijini oshirish ekanligini ta’kidlab o‘tdi.
“Futbol bo‘yicha jahon chempionati insonlarni, ayniqsa, yoshlarni bir-biriga bog‘lab turuvchi vosita bo‘lib, u barchaga quvonch, zavq, umid bag‘ishlaydi. Shunday qilib, biz O‘zbekistonga ushbu quvonch, umidni olib kelish, mamlakat yoshlarini ruhlantirish uchun Jahon kubogi sayohatini O‘zbekistonga qadar uzaytirdik”, — dedi Serkan Murat. Tadbir davomida futbol yulduzi Kristian Karambyo Ravshan Ermatovga O‘zbekiston futbol assotsiatsiyasi muzeyi uchun FIFA maxsus sovrinining kichik nusxasini sovg‘a qildi.
Tadbir tashkilotchilarining ta’kidlashicha, Coca-Cola tashkil etayotgan FIFA Woorld Cup™ xalqaro kubok-turi o‘zi tashrif buyurayotgan mamlakatlarda barqaror taraqqiyotni ta’minlashga oid harakatlarni rivojlantirishga intiladi. Shu sababli Toshkentda o‘tkaziladigan tadbirlar davomida yig‘ilgan butun PET plastmassa qayta ishlashga yuboriladi.
Ma’lumot uchun, Coca-Cola kompaniyasi FIFA bilan 1976-yildan buyon yaqindan hamkorlik qilib keladi va 1978-yildan futbol bo‘yicha FIFA™ jahon chempionatining rasmiy homiysi hisoblanadi. Coca-Cola 1950-yildan beri jahon chempionatlari o‘yinlari o‘tkazilgan har bitta stadionda o‘z reklamasini joylashtirib, barcha pog‘onalarda futbolni har doim qo‘llab-quvvatlab keladi.
Reklama huquqi asosida.
Izoh (0)