FIFA World Cup Trophy Tour лойиҳаси доирасида футбол бўйича Жаҳон кубоги Ўзбекистонга олиб келинди.
5 июнь куни кубок ортилган рейс Ливан пойтахти Байрутдан Тошкент халқаро аэропортига келиб қўнди. Coca-Cola ташкил этилган FIFA World Cup™ халқаро кубок-тури расмий кутиб олиш маросимида Тошкент шаҳар ҳокими Жаҳонгир Ортиқхўжаев, Спортни ривожлантириш вазири Адҳам Икромов ва ЎФА биринчи вице-президенти Равшан Эрматов иштирок этди.
Таъкидлаб ўтиш лозимки, 2022 йил ўзбек футболи учун катта аҳамият касб этади. Чунки бу йил кўплаб мухлисларни руҳлантирадиган ва қувончига сабаб бўладиган футбол юртимизга кириб келганининг 110 йиллиги нишонланмоқда.
6 июнь куни эса FIFA World Cup Trophy Tour by Coca-Cola лойиҳаси доирасида Тошкентда бир нечта тадбирлар бўлиб ўтди. Уларда Жаҳон чемпионлари Кристиан Карамбё ва Карлес Пуйоль иштирок этди.
Аввал меҳмонлар Жаҳон чемпионати кубогини ўзбекистонлик ёш футболчиларга намойиш этиш ва мастер-класс ўтказиш учун «Бунёдкор» академияси стадионига боришди. Футбол афсоналари Кристиан Карамбё ва Карлес Пуйоль ёшларимиз билан суҳбатлашиб, улар билан биргаликда футбол ўйнади. Учрашувни собиқ ФИФА рефериси, ЎФА биринчи вице-президенти Равшан Эрматов бошқарди. Сўнгра Tashkent City Congress Hall’да куннинг асосий тадбири, Coca-Cola томонидан Ўзбекистонга олиб келинган футбол бўйича Жаҳон чемпионати кубогининг оммавий намойиши бўлиб ўтди.
4000 нафардан зиёд киши футбол тарихидаги энг буюк тимсол олдида туриб, у билан суратга тушиш имкониятига эга бўлишди. Coca-Cola компаниясининг Ўзбекистондаги ваколатхонаси раҳбари Серкан Мурат Жаҳон кубогини Ўзбекистонга олиб келишдан асосий мақсад, мамлакатда бўлаётган ислоҳотларни қўллаб-қувватлаш ва Ўзбекистоннинг жаҳон аренасидаги имижини ошириш эканлигини таъкидлаб ўтди.
«Футбол бўйича жаҳон чемпионати инсонларни, айниқса, ёшларни бир-бирига боғлаб турувчи восита бўлиб, у барчага қувонч, завқ, умид бағишлайди. Шундай қилиб, биз Ўзбекистонга ушбу қувонч, умидни олиб келиш, мамлакат ёшларини руҳлантириш учун Жаҳон кубоги саёҳатини Ўзбекистонга қадар узайтирдик», — деди Серкан Мурат. Тадбир давомида футбол юлдузи Кристиан Карамбё Равшан Эрматовга Ўзбекистон футбол ассоциацияси музейи учун ФИФА махсус совринининг кичик нусхасини совға қилди.
Тадбир ташкилотчиларининг таъкидлашича, Coca-Cola ташкил этаётган FIFA Woorld Cup™ халқаро кубок-тури ўзи ташриф буюраётган мамлакатларда барқарор тараққиётни таъминлашга оид ҳаракатларни ривожлантиришга интилади. Шу сабабли Тошкентда ўтказиладиган тадбирлар давомида йиғилган бутун ПЭТ пластмасса қайта ишлашга юборилади.
Маълумот учун, Coca-Cola компанияси ФИФА билан 1976 йилдан буён яқиндан ҳамкорлик қилиб келади ва 1978 йилдан футбол бўйича ФИФА™ жаҳон чемпионатининг расмий ҳомийси ҳисобланади. Coca-Cola 1950 йилдан бери жаҳон чемпионатлари ўйинлари ўтказилган ҳар битта стадионда ўз рекламасини жойлаштириб, барча поғоналарда футболни ҳар доим қўллаб-қувватлаб келади.
Реклама ҳуқуқи асосида.
Изоҳ (0)