Endilikda iste’molchilar “Hududgaz.uz” sayti orqali sarflagan gaz xarajatlarini bilib olishlari mumkin. Buning uchun onlayn kalkulyator ishga tushirildi. Energetika vazirligining “Daryo”ga ma’lum qilishicha, tizim iste’mol qilingan tabiiy gaz uchun amaldagi va taklif etilayotgan tariflar bo‘yicha qiyosiy hisob-kitoblarni amalga oshiradi.
“Bu qulaylik yangi joriy etilgan “Iste’molchi” tizimiga ham tatbiq qilinadi. Tizim tabiiy gaz foydalanuvchilarining shaxsiy hisob raqamini boshqarishi va onlayn xizmatlarni olish bo‘yicha yaqin ko‘makchi hisoblanadi. Ya’ni, shaxsiy kabinet aholiga yanada qulaylik yaratish maqsadida joriy qilingan bo‘lib, iste’molchilar ushbu kabinet orqali byurokratik to‘siqlarsiz, bir nechta gaz xizmatlaridan foydalanish imkoniyatiga ega. Jumladan, shaxsiy kabinetdan foydalanish uchun birinchi navbatda iste’molchi ro‘yxatdan o‘tishi va kerakli ma’lumotlarni to‘ldirishi kerak. Yangi tizimning afzalligi shundaki, agar foydalanuvchida bir nechta shaxsiy hisob raqam bo‘lsa, ularning holatini, shuningdek, barcha obyektlari uchun gaz iste’moli va to‘lovlarni kuzatib borishi, kunlik, oylik gaz iste’moli hamda qarzdorlik haqidagi ma’lumotlarni olishi mumkin. Eng muhimi, uydan chiqmasdan yoki dunyoning istalgan nuqtasidan onlayn to‘lovning keng imkoniyatlaridan foydalangan holda, xizmatlar uchun to‘lov amalga oshirish imkoniyati mavjud”, – deyiladi manba ma’lumotida.
Avvalroq iste’molchilar uchun elektr energiyasi sarfini hisoblovchi onlayn kalkulyator ishga tushirilgani xabar qilingandi.
Izoh (0)