Buyuk Britaniya Jamoatchilik palatasining Konservativ partiyadan a’zolari Boris Jonsonning partiya yetakchisi lavozimida va buning natijasi o‘laroq, mamlakat bosh vaziri sifatida o‘z ishini davom ettirishini yoqlab ovoz berdi, deb yozadi Meduza.
Jonsonni qo‘llab-quvvatlab 211 kishi ovoz bergan bo‘lsa, 148 kishi qarshi chiqdi. Ovoz berishda qaror oddiy ko‘pchilik bilan qabul qilindi.
Boris Jonson konservatorlarga unga ishonch votumi e’lon qilingani tufayli minnatdorlik bildirib, natijani mamlakat uchun “ishonchli va hal qiluvchi” deb atadi. “Bu shuni bildiradiki, biz hukumat sifatida olg‘a intilishimiz, mening fikrimcha, odamlar uchun haqiqatda muhim bo‘lgan narsalarga e’tiborimizni qaratishimiz mumkin bo‘ladi”, — dedi Jonson va unga ishonch votumi e’lon qilinganidan keyin muddatidan oldingi saylovlarni o‘tkazmoqchi emasligini bildirdi.
Shuningdek, u partiyadoshlari ziyofat uyushtirib, bu voqeani nishonlashi kerakligini aytib hazillashdi.
Ishonchsizlik votumini 2020—2021-yillarda qat’iy lokdaunlar va cheklovlar paytida hukumat a’zolari va Jonsonning o‘zi uyushtirgan ziyofatlar bilan bog‘liq mojaro tufayli e’lon qilishmoqchi edi. Jonsonning o‘zi iste’foga chiqishdan bosh tortayotgandi.
Ishonchsizlik votumiga ovoz berish Jamoatchilik palatasining Konservativ partiyadan a’zolari orasida bo‘lib o‘tdi, qaror oddiy ko‘pchilik bilan qabul qilindi. Ishonchsizlik votumi e’lon qilingan taqdirda Jonson partiyaning yangi yetakchisi saylanguniga qadar bosh vazir bo‘lib qolardi. Endi esa yaqin bir yil ichida ovoz berishni qaytadan o‘tkazish mumkin bo‘lmaydi.
Britaniyalik jurnalistlar qayd etishicha, Jonson erishgan natija undan avvalgi bosh vazir Tereza Meyga nisbatan xuddi shunday ovoz berish natijasidan yomonroq bo‘lgan. O‘shanda Mey raqiblari bilan ziddiyatda g‘olib chiqqan bo‘lsa-da, bir necha oydan keyin baribir iste’foga chiqqan edi. 2018-yil dekabrida Tereza Meyni yoqlab 200 kishi, unga qarshi esa 117 kishi ovoz bergandi.
Ukraina hukumati Boris Jonson rahbarligi ostidagi Buyuk Britaniyani moliyaviy va harbiy ko‘mak yetakchilaridan biri deb atamoqda. Rossiya qo‘shinlari Ukraina shimolidan chekinganidan keyin Jonson G‘arb yetakchilari orasida birinchilardan bo‘lib Kiyevga kelgan edi.
Mavzuga doir:
Izoh (0)