Буюк Британия Жамоатчилик палатасининг Консерватив партиядан аъзолари Борис Жонсоннинг партия етакчиси лавозимида ва бунинг натижаси ўлароқ, мамлакат бош вазири сифатида ўз ишини давом эттиришини ёқлаб овоз берди, деб ёзади Meduza.
Жонсонни қўллаб-қувватлаб 211 киши овоз берган бўлса, 148 киши қарши чиқди. Овоз беришда қарор оддий кўпчилик билан қабул қилинди.
Борис Жонсон консерваторларга унга ишонч вотуми эълон қилингани туфайли миннатдорлик билдириб, натижани мамлакат учун «ишончли ва ҳал қилувчи» деб атади. «Бу шуни билдирадики, биз ҳукумат сифатида олға интилишимиз, менинг фикримча, одамлар учун ҳақиқатда муҳим бўлган нарсаларга эътиборимизни қаратишимиз мумкин бўлади», — деди Жонсон ва унга ишонч вотуми эълон қилинганидан кейин муддатидан олдинги сайловларни ўтказмоқчи эмаслигини билдирди.
Шунингдек, у партиядошлари зиёфат уюштириб, бу воқеани нишонлаши кераклигини айтиб ҳазиллашди.
Ишончсизлик вотумини 2020—2021 йилларда қатъий локдаунлар ва чекловлар пайтида ҳукумат аъзолари ва Жонсоннинг ўзи уюштирган зиёфатлар билан боғлиқ можаро туфайли эълон қилишмоқчи эди. Жонсоннинг ўзи истеъфога чиқишдан бош тортаётганди.
Ишончсизлик вотумига овоз бериш Жамоатчилик палатасининг Консерватив партиядан аъзолари орасида бўлиб ўтди, қарор оддий кўпчилик билан қабул қилинди. Ишончсизлик вотуми эълон қилинган тақдирда Жонсон партиянинг янги етакчиси сайлангунига қадар бош вазир бўлиб қоларди. Энди эса яқин бир йил ичида овоз беришни қайтадан ўтказиш мумкин бўлмайди.
Британиялик журналистлар қайд этишича, Жонсон эришган натижа ундан аввалги бош вазир Тереза Мейга нисбатан худди шундай овоз бериш натижасидан ёмонроқ бўлган. Ўшанда Мей рақиблари билан зиддиятда ғолиб чиққан бўлса-да, бир неча ойдан кейин барибир истеъфога чиққан эди. 2018 йил декабрида Тереза Мейни ёқлаб 200 киши, унга қарши эса 117 киши овоз берганди.
Украина ҳукумати Борис Жонсон раҳбарлиги остидаги Буюк Британияни молиявий ва ҳарбий кўмак етакчиларидан бири деб атамоқда. Россия қўшинлари Украина шимолидан чекинганидан кейин Жонсон Ғарб етакчилари орасида биринчилардан бўлиб Киевга келган эди.
Изоҳ (0)