Qozog‘iston prezidenti Qosim-Jo‘mart To‘qayev mamlakatdagi yanvar voqealari chog‘ida halok bo‘lganlar ro‘yxati e’lon qilinadi, deb va’da berdi.
“Halok bo‘lganlar ro‘yxatiga kelsak, tabiiyki, u e’lon qilinadi, butun jamiyatimizga oshkor etiladi. Terrorchilik tomonida halok bo‘lganlar juda ko‘p. Ya’ni o‘z xatti-harakatlari bilan davlat tuzumini qo‘pormoqchi bo‘lganlar. Ammo davlatimizga qarshi uyushtirilgan bu hujumlarga aloqasi bo‘lmagan odamlar ham bor”, — dedi To‘qayev 5-iyun kuni Nursultondagi saylov uchastkasida jurnalistlar bilan suhbatda.
“Shu munosabat bilan, biz albatta, hamdardmiz va afsusdamiz. Tinch aholiga qarshi asossiz harakatlarga jalb qilingan harbiy xizmatchilarning barchasi, tabiiyki, javobgarlikka tortiladi, surishtiruv olib borilmoqda, ballistik ekspertizalar o‘tkazilmoqda. Shuning uchun hammasi ma’lum bo‘ladi”, — deya ta’kidladi prezident.
Uning qo‘shimcha qilishicha, Qozog‘iston yanvar voqealarini ochiq-oshkora tekshirmoqda, xalqaro ekspertlarni taklif qilishga zarurat yo‘q.
“Tergov vakolatli organlar tomonidan puxta va batafsil olib borilmoqda. Hozir qo‘limiz ostida mavjud bo‘lgan materiallarning barchasi bosh prokuratura tomonidan e’lon qilib borilmoqda, jamiyatimizga nisbatan yoki jamiyatimiz uchun sir bo‘lgan narsalar yo‘q”, — dedi To‘qayev.
Prezident bergan ma’lumotga ko‘ra, yanvar voqealari bo‘yicha 5,5 mingta jinoyat ishi qo‘zg‘atilgan, shularning 500 tasi sudga yuborilgan.
“Shu narsaga e’tiborni qaratmoqchimanki, bor-yo‘g‘i 23 kishi haqiqiy jazo muddatiga hukm qilindi. Bu shundan dalolat beradiki, biz bu fojiali holatni tekshirishga juda puxtalik bilan yondashyapmiz”, — deya qayd etdi davlat rahbari.
U hamon bo‘lib o‘tgan voqealarni terrorchilik hujumi deb hisoblashini aytdi. “Davlatga qarshi operatsiyaning o‘zi aniq rejalashtirilgan xususiyatga ega edi, uni yaxshi tayyorlangan professionallar boshqargan”, — qo‘shib qo‘ydi u.
Yanvar boshida mamlakat g‘arbidagi Janaozen shahrida boshlangan tinch mitinglar butun mamlakat bo‘ylab iqtisodiy va siyosiy talablardan iborat ommaviy noroziliklarga aylanib ketdi. Ba’zi hududlarda ma’muriy binolar, militsiya bo‘linmalari, do‘konlarga hujumlar boshlandi. Jinoiy guruhlar xatti-harakatlaridan eng ko‘p Olmaota jabr ko‘rdi.
Izoh (0)