Koronavirusning yangi, yanada xavfliroq, hozirgi vaksinalarga chidamli shtammi paydo bo‘lishi — haqiqatda mavjud bo‘lgan xavf. Bu haqda Jahon sog‘liqni saqlash tashkiloti bosh direktori Tedros Adanom Gebreyesus Bratislavada xavfsizlik bo‘yicha anjumanda nutq so‘zlayotib aytib o‘tdi.
Uning so‘zlariga ko‘ra, tashkilotni ba’zi mintaqalardagi raqamlarning o‘sishi tashvishlantirmoqda. Afrika va G‘arbiy Tinch okeani mintaqasida o‘lim bilan tugayotgan holatlar haqidagi xabarlar ko‘paymoqda. Amerikada nafaqat COVID-19 oqibatidagi o‘limlar, balki u bilan kasallanishlar ham oshmoqda.
Gebreyesus pandemiya tugadi deyishga hali erta ekanini aytdi. “U tugagani yo‘q”, — deya ta’kidladi tashkilot rahbari.
Uning qayd etishicha, koronavirus qanday rivojlanishini oldindan aytib bo‘lmaydi, biroq bir narsa aniqki, bo‘lg‘usi variantlar hozirgilaridan ustunroq bo‘ladi, buning uchun esa ular yanada yuqumliroq bo‘lishi kerak. “Ammo ular qay darajada og‘ir bo‘lishini bashorat qila olmaymiz”, — deya qo‘shib qo‘ydi JSST rahbari.
Ayni paytda maymunchechak kasalligiga chalinish holatlari tobora oshib bormoqda. JSST 5-iyun kuni xabar berishicha, ushbu kasallik odatda tarqaladigan mamlakatlardan tashqaridagi tasdiqlangan holatlar 780 taga yetgan.
Kasallanganlar 27 ta mamlakatda 13-maydan 2-iyungacha bo‘lgan davr ichida aniqlangan. 207 ta holat Buyuk Britankyada, 156 tasi Ispaniyada, 138 tasi Portugaliyada va 57 tasi Germaniyada qayd etilgan.
Bir hafta avvalgi ko‘rsatkich 257 tani tashkil qilgandi.
Izoh (0)