AQSH Ukraina donining to‘siqsiz eksporti evaziga Rossiyadan sanksiyalarning bir qismi olib tashlanishiga rozi bo‘lmaydi. Bu haqda amerikalik rasmiyga tayanib Politico xabar berdi.
U bu boradagi Rossiya bayonotlarini “tovlamachilik diplomatiyasi” deb atagan.
AQSH prezidenti ma’muriyati, shuningdek, AQSH qonunchilari Rossiyaning ehtimoliy oziq-ovqat inqirozidan chiqishda yordam berishi haqidagi da’volariga shubha bilan qarashadi.
Aydaxo shtati senatori Jim Rish don eksporti muammosi doirasida Rossiyaga nisbatan sanksiyalarni bekor qilish g‘oyasini “shantaj” deb hisoblaydi.
Ko‘pchilik rasmiylar Ukraina donini yetkazib berish bilan bog‘liq vaziyat bo‘yicha muzokaralar qanday yakunlanishini va Rossiya sanksiyalar bosimini yumshatish haqida o‘z da’volaridan voz kechishini kutmoqda.
Birlashgan Millatlar Tashkiloti (BMT)ning ta’kidlashicha, g‘alla eksportiga Rossiya kuchlari tomonidan Ukraina portlarining blokadasi to‘sqinlik qilmoqda.
AQSH Rossiyaning xatti-harakatlari global oziq-ovqat inqirozini yanada kuchaytirayotganini ta’kidladi. Shu fonda bosh kotib Antoniu Guterrish donli kemalar o‘tishi evaziga Rossiya va Belarus kaliy o‘g‘itlari eksportiga cheklovlarni yumshatishni taklif qildi.
Moskva G‘arbning “noqonuniy harakatlari” don ta’minoti blokadasiga olib kelganini da’vo qildi. Prezident matbuot kotibi Dmitriy Peskovning ta’kidlashicha, ta’minotni qayta tiklash uchun G‘arb davlatlari “kemalar nizomiga, g‘alla eksportiga va hokazolarga to‘sqinlik qiluvchi noqonuniy qarorlarni bekor qilishi kerak”.
Shuningdek, u port hududidagi suv hududlari kuchli minalanganligi va ular orqali kemalarning o‘tishi xavfli ekanligini tushuntirdi.
Hozir u yerni minalardan tozalash zarur, bu juda qiyin operatsiya. Hozircha bu hududlarda yuk tashish va navigatsiya uchun xavf juda yuqori, — dedi Peskov.Turkiya bilan ham Ukraina g‘allasini eksport qilish imkoniyatlari bo‘yicha muzokaralar olib borilmoqda.
2-iyun kuni “Anadolu” agentligi Rossiya, Ukraina va Turkiya BMT ko‘magida yetkazib berishni amalga oshirish bo‘yicha “yo‘l xaritasi”ni ishlab chiqqani haqida xabar berdi. Yaqin kelajakda ular donli kemalarning yo‘nalishi, sug‘urtasi va xavfsizligini muhokama qiladilar.
Avvalroq Shveysariya Rossiya kompaniyasiga nisbatan sanksiyalarni bekor qilgani haqida xabar berilgan edi.
Izoh (0)