O‘zbekiston va Tojikiston yetakchilarining muzokaralari yakunlari bo‘yicha mahalliy va xorijiy ommaviy axborot vositalari vakillari uchun brifing o‘tkazildi. Bu haqda Prezident matbuot xizmati xabar qildi.
“O‘zbekiston xalqi birodar tojik xalqi bilan tarix, madaniy-ma’naviy meros va ajdodlarimizning ezgu an’analari mushtarakligiga asoslangan do‘stlik va yaxshi qo‘shnichilik munosabatlarini qadrlaydi. Yorug‘ kunlarda ham, sinovli damlarda ham biz doimo yelkama-yelka turganmiz, bir-birimizni qo‘llab-quvvatlaganmiz”, — degan O‘zbekiston rahbari.
Shavkat Mirziyoyev birgalikdagi sa’y-harakatlar bilan ikki tomonlama munosabatlarda haqiqatdan katta marralarga erishishga, ularni juda yuqori darajaga ko‘tarishga muvaffaq bo‘linganini ta’kidlagan.
“Aynan shu tufayli bugun chinakam tarixiy ahamiyatga ega qaror qabul qilindi. Biz Abadiy do‘stlikni mustahkamlash va ittifoqchilik to‘g‘risidagi deklaratsiyani imzoladik”, — deydi Mirziyoyev.
“O‘zbekiston prezidenti mamlakatlarimiz o‘rtasidagi aloqalarni rivojlantirishga qo‘shgan shaxsiy hissasini Tojikistonda juda qadrlashadi. Joriy yil oktabr oyida Tojikiston va O‘zbekiston diplomatik munosabatlar o‘rnatilganining o‘ttiz yilligini nishonlaydilar. Ahamiyatlisi, biz uchun muhim bo‘lgan aynan shu yilda munosabatlarimizni ittifoqchilik darajasiga ko‘tarish bo‘yicha tarixiy qaror qabul qildik”, — degan Emomali Rahmon.
Keyingi yillarda ikki tomonlama tovar ayirboshlash hajmi qariyb 40 barobarga, joriy yil boshidan esa 35 foizga oshgani mamnuniyat bilan qayd etilgan. Tashrif arafasida Dushanbe shahrida Hukumatlararo komissiya yig‘ilishi, Toshkent shahrida esa biznes forum o‘tkazilib, ularning yakunida qiymati 1 milliard dollardan ziyod salmoqli hujjat va shartnomalar imzolandi, sanoat kooperatsiyasi bo‘yicha “yo‘l xaritasi” tasdiqlangan.
Tomonlar yangi tranzit yo‘laklarini shakllantirish va zamonaviy logistika infratuzilmasini yaratish, havo, temir yo‘l transporti va avtobuslar qatnovini ko‘paytirish, birgalikda agroklasterlar va zamonaviy ishlab chiqarish korxonalarini tashkil etish, meva-sabzavot mahsulotlarini qayta ishlash va uchinchi mamlakatlar bozorlariga chiqishga kelishib olgan. Energetika va suvdan oqilona foydalanish borasida samarali hamkorlik uchun noyob imkoniyatlar mavjudligi qayd etilgan. Shu munosabat bilan Tojikiston prezidentining Muzliklarni asrash xalqaro fondini tashkil etish va 2025-yilni Muzliklarni himoya qilish xalqaro yili deb e’lon qilish tashabbusi qo‘llab-quvvatlangan.
Muzokaralarda parlamentlararo muloqot va xalq diplomatiyasini yanada kengaytirish, hududlararo aloqalarni rivojlantirish va madaniy-gumanitar hamkorlikni mustahkamlashga alohida e’tibor qaratilgan.
“Birodar xalqlarimizni o‘zaro boyitish va yaqinlashtirishga, mamlakatlarimiz rivojiga munosib hissa qo‘shayotgan millatlarimizning ko‘p sonli vakillari bizni birlashtiruvchi omil bo‘lib xizmat qilmoqda. Biz milliy madaniy markazlarning muvaffaqiyatli faoliyati uchun bundan buyon ham zarur sharoitlar yaratishga tayyor ekanimizni tasdiqladik”, — deydi O‘zbekiston prezidenti.
Bundan tashqari, O‘zbekiston har yili Tojikiston fuqarolari uchun ajratiladigan ta’lim grantlari sonini ko‘paytirmoqchi. Mamlakatlarda kino, madaniyat kunlari va turli festivallarni muntazam o‘tkazib borish davom ettiriladi. Joriy yilda Alisher Navoiy va Abdurahmon Jomiyning yaqin do‘stligiga bag‘ishlangan qo‘shma filmni suratga olish boshlanadi.0
“O‘ylaymanki, film namoyishi davlatlarimiz o‘rtasidagi diplomatik munosabatlarning 30 yilligini keng nishonlash doirasida uzoq kutilgan voqea bo‘ladi”, — degan Shavkat Mirziyoyev.
Muzokaralar chog‘ida O‘zbekiston va Tojikiston yetakchilari mintaqaviy xavfsizlik va barqarorlik masalalari yuzasidan ham fikr almashgan. Markaziy Osiyo davlatlari rahbarlari Maslahat uchrashuvlarining alohida ahamiyatini, xalqaro tashkilot va tuzilmalar doirasida konstruktiv muloqot va o‘zaro ko‘makni davom ettirish zarurligini qayd etgan.
31-may kuni Shavkat Mirziyoyevning taklifiga binoan Tojikiston prezidenti Emomali Rahmon joriy yil 2—3-iyun kunlari rasmiy tashrif bilan O‘zbekistonda bo‘lishi haqida xabar berildi.
Emomali Rahmon 2-iyun kuni ertalab Toshkentga yetib keldi. U yo‘lovchi reyslarini bajaruvchi samolyotdan foydalangan. “Sputnik Tojikiston”ning qayd etishicha, Tojikiston rahbari budjet pullarini iqtisod qilish uchun shaxsiy samolyot sotib olishni istamagan.
Toshkent xalqaro aeroportida uni prezident Shavkat Mirziyoyev kutib olgan. Yetakchilar o‘rtasida qisqa suhbat bo‘lib o‘tgan. So‘ng Ko‘ksaroyda Emomali Rahmonni rasmiy kutib olish marosimi bo‘lib o‘tgan. Marosimda ikki mamlakat rasmiy delegatsiyalari a’zolari ham ishtirok etgan.
Bundan tashqari, davlat rahbarlari o‘rtasida tor doirada uchrashuv bo‘lib o‘tdi. Muzokalarda Markaziy Osiyoda tinchlik va barqarorlikni ta’minlash masalalari muhokama qilindi. Muzokaralar ikki mamlakat delegatsiyalari ishtirokida kengaytirilgan tarkibda davom etdi. Prezidentlar fan, ta’lim, san’at, kino va turizm sohalaridagi hamkorlikka e’tibor qaratish zarurligini ta’kidladi.
Shundan so‘ng Zarafshon daryosida Yavan gidroelektr stansiyasi qurilishini boshlash marosimi bo‘lib o‘tdi. Shavkat Mirziyoyev va Emomali Rahmon ramziy tugmani bosib, qurilishga start berdi.
Oliy darajadagi muzokaralar yakunida hujjatlarni imzolash va almashish marosimi bo‘ldi. Shavkat Mirziyoyev va Emomali Rahmon Abadiy do‘stlikni mustahkamlash va ittifoqchilik to‘g‘risidagi deklaratsiyani imzoladi.
Izoh (0)