“Kun.uz” nashrida “Ikki oy oldin armiyaga kuzatilgan yigit yurak xurujidan o‘lgani aytilmoqda, marhumning yaqinlari bunga ishonmayapti” sarlavhali xabar e’lon qilindi. Mudofaa vazirligi vaziyatga munosabat bildirdi.
Unda aytilishicha, holat yuzasidan Qarshi harbiy prokuraturasi tomonidan tergovga qadar tekshiruv harakatlari olib borilmoqda.
Bosh prokuror matbuot kotibi Hayot Shamsutdinov “holat sinchkovlik bilan, har tomonlama, to‘la va xolisona tekshirib chiqilishi va natijasi bo‘yicha qo‘shimcha xabar qilinishi” haqida ma’lumot berdi.
“Kun.uz”da e’lon qilingan maqolada aytilishicha, 8-aprel kuni armiya safiga ketgan Ruslan Qidiraliyev 29-may kuni vafot etgan. Sud-tibbiy ekspertizasining dastlabki xulosasida 18 yashar askarning o‘limiga“yurakning surunkali ishemik kasalligi, yurak gipertrofiyasi, kardioskleroz, aorta va yurak toj tomirlari aterosklerozi sabab bo‘lgani, ekspertiza tekshiruvi jarayonida marhumda o‘tkir yurak va qon-tomirlari yetishmovchiligi, bosh miya va o‘pka shishi ko‘rinishidagi kasalliklar asoratlari aniqlangani qayd etilgan.
Biroq marhumning yaqinlari bunga ishonishmayapti. Agar o‘g‘limizda qandaydir surunkali kasallik bo‘lganida bu tibbiy ko‘riklar vaqtida aniqlanar va uni harbiy xizmatga olishmasdi, deyishmoqda marhumning ota-onasi.
Avvalroq Farg‘onada 2 nafar harbiy xizmatchi is gazidan vafot etgani, Chirchiqdagi harbiy poligonda 21 yoshli yigit snaryad portlashi oqibatida halok bo‘lgani haqida xabar berilgan.
Izoh (0)