Шавкат Мирзиёев ва Тожикистон президенти Эмомали Раҳмоннинг музокаралари 2 июнь куни икки мамлакат делегациялари иштирокида кенгайтирилган таркибда давом этди. Бу ҳақда Президент матбуот хизмати хабар қилди.
Қайд этилишича, Ўзбекистон раҳбари кўп қиррали ҳамкорликнинг барча йўналишларида муваффақиятларга эришилганини қайд этган. Тожикистон Ўзбекистоннинг ишончли стратегик шеригимиз эканини таъкидлаган. Президент ўзаро манфаатли ва ҳар томонлама ҳамкорликни мустаҳкамлашга тайёрлигини билдирган.
Куни кеча ўтган ҳукуматлараро комиссия йиғилиши ва бизнес форумда 1 миллиард долларлик янги битим ва шартномалар имзолангани қайд этилган. Транспорт, ҳудудлараро ҳамкорлик, парламентлараро ва маданий-гуманитар алоқалар борасида ҳам муҳим натижаларга эришилган.
Икки давлат пойтахтлари Тошкент ва Душанбе шаҳарлари, Сурхондарё ва Хатлон вилоятлари ҳамда Тошкент, Фарғона, Самарқанд ва Сўғд вилоятлари ўртасида самарали алоқалар йўлга қўйилган. Мазкур ташриф доирасида ҳамкорлик бўйича «йўл харитаси»ни Жиззах ва Сўғд вилоятлари ҳам қабул қилади.
Президентлар мамлакатлар ўртасидаги иқтисодий шериклик устувор аҳамиятга эга эканини, савдо ҳажми ва номенклатурасини каррасига ошириш учун катта салоҳият мавжудлигини таъкидлаган. Машинасозлик, электротехника, тўқимачилик, чарм, фармацевтика, озиқ-овқат, агросаноат, тоғ-кон, металлургия ва бошқа тармоқларда лойиҳаларни амалга ошириш учун имкониятлар борлиги кўрсатилган.
Ўзбекистон-Тожикистон инвестиция компанияси салоҳиятини фаол ишга солиш орқали ҳудудлараро ва саноат кооперацияси лойиҳаларини амалга ошириш долзарблиги кўрсатиб ўтилган. Маданий-гуманитар ҳамкорликни мустаҳкамлаш тўғрисида келишувларга эришилган. Президентлар фан, таълим, санъат, кино ва туризм соҳаларидаги ҳамкорликка эътибор қаратиш зарурлигини таъкидлаган. Ёшларнинг интеллектуал салоҳиятини ривожлантириш ва маънавиятини юксалтириш устувор йўналиш сифатида қайд этилган.
31 май куни Шавкат Мирзиёевнинг таклифига биноан Тожикистон президенти Эмомали Раҳмон жорий йил 2—3 июнь кунлари расмий ташриф билан Ўзбекистонда бўлиши ҳақида хабар берилди.
Эмомали Раҳмон 2 июнь куни эрталаб Тошкентга етиб келди. У йўловчи рейсларини бажарувчи самолётдан фойдаланган. «Спутник Тожикистон»нинг қайд этишича, Тожикистон раҳбари бюджет пулларини иқтисод қилиш учун шахсий самолёт сотиб олишни истамаган.
Тошкент халқаро аэропортида уни президент Шавкат Мирзиёев кутиб олган. Етакчилар ўртасида қисқа суҳбат бўлиб ўтган. Сўнг Кўксаройда Эмомали Раҳмонни расмий кутиб олиш маросими бўлиб ўтган. Маросимда икки мамлакат расмий делегациялари аъзолари ҳам иштирок этган.
Бундан ташқари, давлат раҳбарлари ўртасида тор доирада учрашув бўлиб ўтди. Музокаларда Марказий Осиёда тинчлик ва барқарорликни таъминлаш масалалари муҳокама қилинди.
Изоҳ (0)