1-iyundan O‘zbekiston va Turkmaniston davlat chegarasidagi “Farap-Olot” o‘tkazish punktlari odatiy rejimga qaytdi va Turkmaniston hududiga xorijiy avtotashuvchilarning kirishi bilan bog‘liq bir qator cheklovlar bekor qilindi. Bu haqda Davlat bojxona qo‘mitasi matbuot xizmati “Daryo”ga ma’lum qildi.
Ta’kidlanishicha, bu haqda O‘zbekiston delegatsiyasi tarkibida Davlat bojxona qo‘mitasi raisi o‘rinbosari Otabek Ibragimovning Turkmanistonga xizmat safari doirasida Ashxobod shahrida bojxona sohasida bo‘lib o‘tgan uchrashuvda ma’lum qilingan.
Ishchi uchrashuvda ikki davlat o‘rtasida o‘zaro savdoda olib o‘tilgan tovarlar to‘g‘risida ma’lumot almashinuvi bo‘yicha bayonnoma loyihasi hamda bojxona chegarasi orqali olib o‘tilayotgan tovar va transport vositalari to‘g‘risida oldindan axborot almashinuvi bo‘yicha texnik shartlar ko‘rib chiqilgan.
Shuningdek, “Farap-Olot” o‘tkazish punktlari orqali kuniga kamida 500 ta yuk avtotransport vositalarining harakatlanishini ta’minlashga kelishib olingan. Xizmat safari davomida Davlat bojxona qo‘mitasi xodimlari Turkmenbashi portida bo‘lib, bu yerdagi bojxona tartibi bilan yaqindan tanishgan.
Izoh (0)