Rossiya gaz uchun to‘lovni rublda talab qilgani uchun sudga tortilmoqda

Finlyandiyaning Gasum davlat energetika kompaniyasi Rossiya tomonining gaz uchun rublda to‘lash talablari tufayli hakamlik sudiga murojaat qiladi. U, shuningdek, bunday shartlar asosida savdo operatsiyalarini o‘tkazishdan bosh tortishini e’lon qildi.

Gasum rubl hisob-kitoblariga o‘tish taklifini qabul qilmaydi. Bundan tashqari, kompaniyalar o‘rtasida kelishuv bo‘yicha ilgari surilgan boshqa talablar bo‘yicha jiddiy kelishmovchiliklar mavjud, — deyiladi kompaniya rasmiy saytida e’lon qilingan press-relizda.

Gasum vakillarining ta’kidlashicha, bunday vaziyatda kompaniya “shartnomani hakamlik sudiga topshirishdan boshqa iloji qolmagan”, chunki “Gazprom”ning talabi Finlyandiya iste’molchilari manfaatlariga ziddir.

Ular “Gazprom”ning rublda eksport operatsiyalarini amalga oshirish bo‘yicha bir tomonlama so‘rovi kompaniyalar o‘rtasida 2021-yil kuzida tuzilgan shartnoma shartlariga to‘g‘ri kelmasligini ta’kidladilar.

Rossiya prezidenti Vladimir Putin 31-mart kuni “do‘st bo‘lmagan mamlakatlar”ga gaz yetkazib berish uchun to‘lovlarni rublga o‘tkazish to‘g‘risidagi farmonni imzoladi.

Yangilangan shartlarga rozi bo‘lmagani uchun bir qator Yevropa energetika kompaniyalari Rossiya bilan hamkorlik qilishdan bosh tortdi.

Avvalroq Yevropa Rossiya gazini sanksiyalarni buzmasdan sotib olish rejasini ishlab chiqqani haqida xabar berilgan edi.