Qashqadaryo viloyatining Qarshi shahrida xavfsizlik kamariga yozilgan jarimalar sabab to‘polon ko‘targan haydovchilarning 3 nafari qamaldi. 12 nafari ogohlantirildi. Bu haqda “Daryo”ga viloyat IIB axborot xizmati xabar berdi.
To‘polon voqeasidan so‘ng holatga oydinlik kiritish maqsadida ichki ishlar organlari xodimlari tomonidan surishtiruv ishlari olib borilgan. O‘rganishlarga ko‘ra, Qarshi shahrida yashovchi, xususiy korxonada ro‘yxatdan o‘tib, kirakashlik bilan shug‘ullanuvchi uch nafar fuqaro voqeaga boshchilik qilgani ma’lum bo‘lgan.“Mazkur qoidabuzarlik yuzasidan to‘plangan hujjatlar mazmunan ko‘rib chiqishlik uchun jinoyat ishlari bo‘yicha Qarshi shahar sudiga yuborilgan. Sud ma’muriy ish materiallarini ko‘rib chiqib, qoidabuzarlar Ma’muriy javobgarlik to‘g‘risidagi kodeksning 201-moddasi 1-qismi (jamoat tartibini buzish huquqbuzarligi)ni sodir etganlikda aylanib, uch nafar haydovchining har biriga o‘n sutkadan ma’muriy qamoq jazosi tayinlagan. Bundan tashqari jamoat tartibini buzish huquqbuzarligi voqeasida ishtirok etgan 12 nafar haydovchi esa IIO xodimlari tomonidan rasmiy ravishda ogohlantirilgan”, — deyiladi rasmiy axborotda.
Viloyat IIB haydovchilar va fuqarolarga qonunlarni bilmaslik javobgarlikdan ozod etmasligini eslatib, yo‘l harakati qoidalari, shuningdek, avtoyo‘llarda harakatlanish qoidalariga qat’iy amal qilishni so‘rab qolgan.
Izoh (0)