1-iyundan boshlab Toshkentdagi do‘konlarda “buxanka” nonlarni 2 800 so‘mdan sotish boshlangani to‘g‘risida xabar berilgandi. Monopoliyaga qarshi kurashish qo‘mitasiga ko‘ra qolipli non narxi oshgani bo‘yicha tezkor o‘rganishlar o‘tkazilgan.
O‘rganishlar davomida aniqlanishicha, “buxanka” non narxi Toshkent shahrida eng yuqori — 2800 so‘m, Qashqadaryoda viloyatida eng past — 1650 so‘m, respublika bo‘yicha o‘rtacha narx esa 2250 so‘mni tashkil etmoqda.
Shuningdek, ta’kidlanishicha, un mahsuloti 2022-yil iyun oyidan boshlab birja savdolariga yetarli miqdorda qo‘yilmoqda va bu jarayon ustidan doimiy nazorat o‘rnatilgan. Respublikada un mahsuloti zaxirasi shakllantirilgan bo‘lib, narx-navolarning keskin oshib ketmasligi uchun zarur miqdorda un savdolarga qo‘yib boriladi.
Xususan, iyun oyida 170 ming tonna un birjaga qo‘yilishi, bunda har bir non ishlab chiqaruvchi uchun teng sharoit yaratish maqsadida kichik lotlarda (3 tonnadan) qo‘yilmoqda. 1-iyun holatida 50,5 ming tonnadan ortiq un mahsuloti qoldig‘i mavjud bo‘lib, avgust oyigacha un ishlab chiqarish uchun korxonalarda zarur don qoldig‘i mavjud.
“Shu o‘rinda aytib o‘tish lozimki, un mahsuloti realizatsiya qilinishining bozor tamoyillariga asoslangan mexanizmi joriy qilinishi, birinchi navbatda bug‘doy yetishtiruvchi fermer va dehqonlardan tortib, ishlab chiqaruvchi va iste’molchilar manfaatini ko‘zlab qilingan qadam bo‘lib, ushbu jarayonda shaffof tizim yaratilishi bilan birga, respublikaning eng chekka hududlariga ham mahsulotning yetib borilishi nazoratga olingan”, — deyiladi munosabatda.
Qo‘mita non ishlab chiqaruvchi va sotuvchilar hamda aholidan bu borada xavotirga tushmaslikni, ijtimoiy tarmoqlar orqali tarqatilayotgan asoslanmangan ma’lumotlarga ishonib, sun’iy ajiotaj vujudga keltirmasliklarini so‘ragan. Bozorda sun’iy tanqislik yuzaga kelishi va narxlarning keskin oshib ketish holatlarini kuzatganda, Monopoliyaga qarshi kurashish qo‘mitasining ishonch telefoniga (71-207-47-00), qo‘mita huzuridagi Iste’molchilar huquqini himoya qilish agentligi Call-markaziga (1159 qisqa raqam) yoki qo‘mitaning matbuot xizmatiga (71-207-47-00 (ichki 224) murojaat qilish mumkin.
Avvalroq “G‘allani yetishtirish va sotishda bozor tamoyilini joriy etishning qo‘shimcha chora-tadbirlari to‘g‘risida”gi prezident qarori qabul qilingandi. Moliya vazirligi departamenti mudiri To‘lqin Mirzayev esa iste’mol bozorida sotilayotgan yopgan nonlar import undan yopilgani uchun qimmatlashayotganini ma’lum qilgan edi.
Izoh (0)