Yo‘l harakati xavfsizligi xodimlari ishtirokidagi foto va videolarni tarqatishni taqiqlashni nazarda tutuvchi qonun loyihasi takomillashtirilib va deputatlar tomonidan qayta ko‘rib chiqiladi. Bu haqda “Milliy tiklanish” partiyasi yetakchisi Alisher Qodirov ma’lum qildi.
Uning so‘zlariga ko‘ra, ijtimoiy tarmoqlardagi ayrim foydalanuvchilar qonundagi YPX xodimini videotasvirga olishni tartibga solish bilan bog‘liq 195-moddasini “Milliy tiklanish” fraksiyasi to‘liq qo‘llab-quvvatladi deb ayuhannos solmoqda.
“Ey baraka topkur, hovliqmasdan, tarqatadigan axborotingni, biroz o‘zingni qiynab tagiga yetsangchi. Qonun fraksiyada birinchi o‘qishda ma’qullandi. Chunki qonun faqat bitta moddadan iborat emas.
Bu qonun yo‘llardagi tartibsizliklarni keltirib chiqarayotgan, oilalarga fojia olib kirayotgan beboshlarni jilovlashga va jazolashga xizmat qilishi kerak. Nizoli holatni videotasvirga olish va huquqni himoya qilish maqsadida foydalanishni (masxaralash, tahqirlash va boshqa g‘araz maqsadlarda emas) hech kim taqiqlamoqchi emas. Jazo ham oshirib yuborilgan, bu ham jiddiy ko‘rib chiqiladi.
Ba’zi ‘xabarshunos vallomatlar’ qachonlardir huquqni muhofaza qiluvchi idoralardan adolatsizlik ko‘rib, g‘azabi ichiga tushib qolgan bo‘lsa haqini talab qilishni o‘rgansin yoki davolansin, chunki g‘azab birinchi navbatda egasini xonavayron qiladi”, — deb yozadi Qodirov.
Alisher Qodirovning qo‘shimcha qilishicha, qonun loyihasi Qonunchilik palatasining yalpi majlisi kun tartibidan chiqarilgan, lekin keyingi majlisgacha tayyorlanadi va albatta, ko‘riladi.
Avvalroq Xalq demokratik partiyasi O‘zbekistonda Yo‘l harakati xodimlarini video va fototasvirga olib tarqatish masalasida hamda katta miqdorda jarima belgilanishi ko‘zda tutilgan qonun loyihasi rad etilganini ma’lum qilgandi.
Izoh (0)