Qozog‘istonning Olmaota shahrida 31-may kuni Yevropa Ittifoqi va Markaziy Osiyoning Afg‘oniston bo‘yicha maxsus vakillarining ikkinchi uchrashuvi bo‘lib o‘tdi. Bu haqda Tashqi ishlar vazirligi xabar qildi.
Qayd etilishicha, uchrashuv ishtirokchilari mamlakatning xalqaro moliyaviy aktivlariga nisbatan qo‘yilgan cheklovlarni olib tashlash va Afg‘oniston xalqiga gumanitar yordam ko‘rsatish muhimligini ta’kidlagan. BMT bosh kotibining Afg‘oniston bo‘yicha maxsus vakili D.Layons, Yevropa Ittifoqining Afg‘oniston bo‘yicha maxsus vakili T.Niklasson, Qozog‘iston prezidentining xalqaro hamkorlik bo‘yicha maxsus vakili K.Kazixon O‘zbekistonning Afg‘onistonga insonparvarlik yordami yetkazib berish uchun chegaradosh Termiz shahrida ko‘p funksiyali transport-logistika xabini yaratish borasidagi sa’y-harakatlarini yuqori baholagan. Shuningdek, Surxondaryo viloyatidagi Afg‘oniston fuqarolarini o‘qitish ta’lim markazi faoliyati e’tirof etilgan.
Tadbir davomida afg‘on inqirozini tinch yo‘l bilan hal etish, mamlakatning mintaqaviy integratsiya jarayonlarida faol ishtirok etishi, uning iqtisodiyotini tiklash va Afg‘onistonda turli infratuzilma loyihalarini amalga oshirish bo‘yicha xalqaro hamda mintaqaviy sa’y-harakatlar muhokama qilingan.
O‘zbekiston prezidentining Afg‘oniston bo‘yicha Maxsus vakili Ismatulla Irgashev o‘z nutqida mamlakatning Afg‘onistonga nisbatan siyosatining asosiy jihatlariga, yangi hokimiyat ma’muriyatiga, shuningdek, ular bilan konstruktiv muloqot o‘rnatish zarurligiga to‘xtalgan.
Yevropa Ittifoqi va Markaziy Osiyo bo‘yicha maxsus vakillar Afg‘onistonning yangi hukumati keng vakillikka asoslangan hukumat tuzishi, ayollar va etnik ozchiliklar huquqlarini hurmat qilishi, shuningdek, mamlakat hududining xalqaro terrorchilar boshpanasiga aylanishining oldini olish bo‘yicha o‘z va’dalari va xalqaro majburiyatlarini bajarish zarurligini qayd etib o‘tgan.
Tadbir so‘ngida yig‘ilish ishtirokchilari Yakuniy bayonotni qabul qilgan.
Mavzuga doir:
- O‘zbekiston va Italiya vakillari Afg‘onistonga insonparvarlik yordamini ko‘rsatish masalalarini muhokama qildi
- O‘zbekiston—Afg‘oniston chegarasida otishma sodir bo‘lgani haqida tarqalgan xabarlar rad etildi
- Mudofaa vazirligi O‘zbekiston harbiy dronlari Afg‘oniston havo hududini buzib o‘tgani haqidagi xabarlarni rad etdi
Izoh (0)