Исматулла Иргашов Афғонистоннинг янги ҳокимияти билан конструктив мулоқот ўрнатиш зарурлигини таъкидлади

Қозоғистоннинг Олмаота шаҳрида 31 май куни Европа Иттифоқи ва Марказий Осиёнинг Афғонистон бўйича махсус вакилларининг иккинчи учрашуви бўлиб ўтди. Бу ҳақда Ташқи ишлар вазирлиги хабар қилди.

Қайд этилишича, учрашув иштирокчилари мамлакатнинг халқаро молиявий активларига нисбатан қўйилган чекловларни олиб ташлаш ва Афғонистон халқига гуманитар ёрдам кўрсатиш муҳимлигини таъкидлаган. БМТ бош котибининг Афғонистон бўйича махсус вакили Д.Лаёнс, Европа Иттифоқининг Афғонистон бўйича махсус вакили Т.Никлассон, Қозоғистон президентининг халқаро ҳамкорлик бўйича махсус вакили К.Казихон Ўзбекистоннинг Афғонистонга инсонпарварлик ёрдами етказиб бериш учун чегарадош Термиз шаҳрида кўп функцияли транспорт-логистика хабини яратиш борасидаги саъй-ҳаракатларини юқори баҳолаган. Шунингдек, Сурхондарё вилоятидаги Афғонистон фуқароларини ўқитиш таълим маркази фаолияти эътироф этилган.

Тадбир давомида афғон инқирозини тинч йўл билан ҳал этиш, мамлакатнинг минтақавий интеграция жараёнларида фаол иштирок этиши, унинг иқтисодиётини тиклаш ва Афғонистонда турли инфратузилма лойиҳаларини амалга ошириш бўйича халқаро ҳамда минтақавий саъй-ҳаракатлар муҳокама қилинган.

Ўзбекистон президентининг Афғонистон бўйича Махсус вакили Исматулла Иргашев ўз нутқида мамлакатнинг Афғонистонга нисбатан сиёсатининг асосий жиҳатларига, янги ҳокимият маъмуриятига, шунингдек, улар билан конструктив мулоқот ўрнатиш зарурлигига тўхталган.

Европа Иттифоқи ва Марказий Осиё бўйича махсус вакиллар Афғонистоннинг янги ҳукумати кенг вакилликка асосланган ҳукумат тузиши, аёллар ва этник озчиликлар ҳуқуқларини ҳурмат қилиши, шунингдек, мамлакат ҳудудининг халқаро террорчилар бошпанасига айланишининг олдини олиш бўйича ўз ваъдалари ва халқаро мажбуриятларини бажариш зарурлигини қайд этиб ўтган.

Тадбир сўнгида йиғилиш иштирокчилари Якуний баёнотни қабул қилган.