Samarqanddagi mahallalarning birida qurilgan ko‘p qavatli bino tasvirlari ijtimoiy tarmoqlarda tarqalib, muhokamalarga sabab bo‘lgandi. Qurilish vazirligi bino qurilishga ruxsat beruvchi shaharsozlik hujjatlari rasmiylashtirilmasdan amalga oshirilganini ma’lum qilgan edi. Samarqand viloyatida soha mutasaddilari ishtirokida o‘tkazilgan matbuot anjumanida ushbu bino bo‘yicha qo‘shimcha ma’lumot berildi, deb yozadi O‘zA.
“Ushbu bino masalasi kecha yoki bugun paydo bo‘lgan emas. Samarqand tumani hokimligi va fuqaro 2015-yildan buyon sudlashmoqda. Sabab bino qurilishiga ruxsat beruvchi shaharsozlik hujjatlari rasmiylashtirilmasdan amalga oshirilgan”, – deydi Samarqand viloyati qurilish nazorat inspeksiyasi boshlig‘i Sa’dulla Ziyodullayev.
Ta’kidlanishicha, qurilishga ruxsat beruvchi Samarqand tumani hokimining qarori yoki tuman qurilish bo‘limining ruxsatnomasi, arxitektura rejalashtirish topshirig‘i mavjud emas. Qurilish davomida ham inspeksiya xodimlari tomonidan bir necha bor qurilishni to‘xtatish bo‘yicha ko‘rsatmalar berilgan, ammo fuqaro bu ishini davom ettirgan.
“Men o‘zim yaqinda shu binoning ichiga kirib ko‘rdim. To‘qqizinchi qavatgacha chiqa oldim, undan tepasiga yuragim dov bermadi. Tepa qavatlar shundoq yo‘l ustida yoki qo‘shnining uyi tepasida turibdi. Fuqaro loyihani yaponlar tayyorlab bergan deyapti. Lekin qurilishning o‘z me’yorlari bor. Tag‘in fuqaro binoning yerto‘lasi va birinchi qavatidan muzlatgich, ikki, uch, to‘rtinchi qavatlaridan savdo do‘konlari, undan yuqorisidan mehmonxona sifatida foydalanmoqchi. Bu hech bir me’yorga to‘g‘ri kelmaydi”, — deydi Ziyodullayev.
Avvalroq “O‘zog‘irsanoatloyiha” AJ va hududiy inspeksiya xodimlari tomonidan 2022-yil 6-may kuni mazkur binoning seysmik holati o‘rganib chiqilib, “O‘zog‘irsanoatloyiha” AJning xulosasiga asosan binoning KMK, SHNK talablariga javob bermasligi va kolonnalarning ayrim joylari darz ketgani o‘z tasdig‘ini topgan hamda binoni buzish bo‘yicha xulosa berilgandi.
Izoh (0)