Самарқанддаги маҳаллаларнинг бирида қурилган кўп қаватли бино тасвирлари ижтимоий тармоқларда тарқалиб, муҳокамаларга сабаб бўлганди. Қурилиш вазирлиги бино қурилишга рухсат берувчи шаҳарсозлик ҳужжатлари расмийлаштирилмасдан амалга оширилганини маълум қилган эди. Самарқанд вилоятида соҳа мутасаддилари иштирокида ўтказилган матбуот анжуманида ушбу бино бўйича қўшимча маълумот берилди, деб ёзади ЎзА.
«Ушбу бино масаласи кеча ёки бугун пайдо бўлган эмас. Самарқанд тумани ҳокимлиги ва фуқаро 2015 йилдан буён судлашмоқда. Сабаб бино қурилишига рухсат берувчи шаҳарсозлик ҳужжатлари расмийлаштирилмасдан амалга оширилган», – дейди Самарқанд вилояти қурилиш назорат инспекцияси бошлиғи Саъдулла Зиёдуллаев.
Таъкидланишича, қурилишга рухсат берувчи Самарқанд тумани ҳокимининг қарори ёки туман қурилиш бўлимининг рухсатномаси, архитектура режалаштириш топшириғи мавжуд эмас. Қурилиш давомида ҳам инспекция ходимлари томонидан бир неча бор қурилишни тўхтатиш бўйича кўрсатмалар берилган, аммо фуқаро бу ишини давом эттирган.
«Мен ўзим яқинда шу бинонинг ичига кириб кўрдим. Тўққизинчи қаватгача чиқа олдим, ундан тепасига юрагим дов бермади. Тепа қаватлар шундоқ йўл устида ёки қўшнининг уйи тепасида турибди. Фуқаро лойиҳани японлар тайёрлаб берган деяпти. Лекин қурилишнинг ўз меъёрлари бор. Тағин фуқаро бинонинг ертўласи ва биринчи қаватидан музлатгич, икки, уч, тўртинчи қаватларидан савдо дўконлари, ундан юқорисидан меҳмонхона сифатида фойдаланмоқчи. Бу ҳеч бир меъёрга тўғри келмайди», — дейди Зиёдуллаев.
Аввалроқ «Ўзоғирсаноатлойиҳа» АЖ ва ҳудудий инспекция ходимлари томонидан 2022 йил 6 май куни мазкур бинонинг сейсмик ҳолати ўрганиб чиқилиб, «Ўзоғирсаноатлойиҳа» АЖнинг хулосасига асосан бинонинг КМК, ШНК талабларига жавоб бермаслиги ва колонналарнинг айрим жойлари дарз кетгани ўз тасдиғини топган ҳамда бинони бузиш бўйича хулоса берилганди.
Изоҳ (0)