Qarshida maktab bitiruvchisi 27 yoshli erkak o‘limida ayblanmoqda

Qashqadaryo viloyatining Qarshi shahridagi xonadonda bosqinchilik sodir etilib, oila boshi vahshiylarcha o‘ldirilgani xabar berilgandi. Viloyat prokuraturasi gumonlanuvchi qo‘lga olinganini qo‘shimcha qildi.

Aniqlanishicha, 2022-yilning 31-may kuni Qarshi shahrining “Komilon” mahalla fuqarolar yig‘inida yashovchi 1995-yilda tug‘ilgan L.A. yashash xonadonidan o‘lik holda topilgan.

“Mazkur holat yuzasidan shu kuni Qarshi shahar prokuraturasi tomonidan 2004-yilda tug‘ilgan O.D.ga nisbatan Jinoyat kodeksining 97-moddasi 2-qismi (og‘irlashtiruvchi holatda qasddan odam o‘ldirish) bilan jinoyat ishi qo‘zg‘atilib, protsessual tartibda ushlangan”, — deyiladi viloyat prokuraturasi axborotida.

Qashqadaryolik bloger Husan Komiljonovning ma’lumot berishicha, qotillikda gumonlanib qo‘lga olingan O.D. Qarshi shahridagi 27-maktabning 11-sinf bitiruvchisi bo‘lib, janoza paytida qo‘lga olingan.

Hozirda viloyat prokuraturasi tomonidan tergov harakatlari olib borilmoqda.