Ijtimoiy tarmoqlarda O‘zbekistonda 1-iyun kuni munosabati bilan hamma bolalar uchun 200 ming so‘m berilishi to‘g‘risidagi xabarlar tarqalgani va bu ma’lumot rad etilgani to‘g‘risida xabar berilgandi. Shunday bo‘lsa-da, ijtimoiy tarmoqlarda fuqarolar moddiy yordam pullarini olish uchun bank filiallari oldida to‘plangani aks etgan videolar tarqaldi. “Xalq banki” moddiy yordam puli uchun bank filiallari oldida to‘plangan aholiga murojaat bilan chiqdi.
Ma’lum qilinishicha, “Aholining ijtimoiy himoyaga muhtoj qatlamlarini manzilli qo‘llab-quvvatlashga oid qo‘shimcha chora-tadbirlar to‘g‘risida”gi qarorga muvofiq, bir martalik moddiy yordam pullari faqatgina yoshga doir, nogironlik pensiyasi va nafaqasini oluvchilarga, bolalikdan nogironlik nafaqasini hamda boquvchisini yo‘qotganlik pensiyasini va nafaqasini oluvchi har bir oila a’zosiga hamda o‘zgalar parvarishiga muhtoj nogironligi bo‘lgan 18 yoshgacha bolalarni parvarishlash nafaqasini oluvchilarga beriladi.
“Bank filiallari oldida to‘planishga hojat yo‘q. Moddiy yordam pullari belgilangan grafikka ko‘ra hududlarda tarqatiladi yo plastik kartalarga tushirib beriladi”, — deyiladi bank xabarida.
O‘z navbatida budjetdan tashqari Pensiya jamg‘armasi direktori Abdulaziz Haydarov ham AOKAda o‘tkazilgan matbuot anjumanida 200 ming so‘mdan nafaqa faqat prezident qarorida belgilangan fuqarolargagina tarqatilishini aytib, kam ta’minlangan oilalar reyestriga kiritilgan, 18 yoshga to‘lmagan 4 milliondan ortiq bolalarga berilishini ma’lum qildi.
Bundan oldin O‘zbekistonda 1-iyundan tibbiyot xodimlarining oylik maoshlari oshirilishi, pensiyani plastik kartada oluvchilarga 1 foiz qo‘shimcha pul berilishi, xorijda ishlayotgan fuqarolar va ularning oila a’zolariga moddiy yordam ko‘rsatilishi xabar qilingan.
Izoh (0)