«Халқ банки» 200 минг сўм моддий ёрдам пули учун банк филиаллари олдида тўпланган аҳолига мурожаат билан чиқди

Ижтимоий тармоқларда Ўзбекистонда 1 июнь куни муносабати билан ҳамма болалар учун 200 минг сўм берилиши тўғрисидаги хабарлар тарқалгани ва бу маълумот рад этилгани тўғрисида хабар берилганди. Шундай бўлса-да, ижтимоий тармоқларда фуқаролар моддий ёрдам пулларини олиш учун банк филиаллари олдида тўплангани акс этган видеолар тарқалди. «Халқ банки» моддий ёрдам пули учун банк филиаллари олдида тўпланган аҳолига мурожаат билан чиқди.

Маълум қилинишича, «Аҳолининг ижтимоий ҳимояга муҳтож қатламларини манзилли қўллаб-қувватлашга оид қўшимча чора-тадбирлар тўғрисида»ги қарорга мувофиқ, бир марталик моддий ёрдам пуллари фақатгина ёшга доир, ногиронлик пенсияси ва нафақасини олувчиларга, болаликдан ногиронлик нафақасини ҳамда боқувчисини йўқотганлик пенсиясини ва нафақасини олувчи ҳар бир оила аъзосига ҳамда ўзгалар парваришига муҳтож ногиронлиги бўлган 18 ёшгача болаларни парваришлаш нафақасини олувчиларга берилади.

«Банк филиаллари олдида тўпланишга ҳожат йўқ. Моддий ёрдам пуллари белгиланган графикка кўра ҳудудларда тарқатилади ё пластик карталарга тушириб берилади», — дейилади банк хабарида.

Ўз навбатида бюджетдан ташқари Пенсия жамғармаси директори Абдулазиз Ҳайдаров ҳам АОКАда ўтказилган матбуот анжуманида 200 минг сўмдан нафақа фақат президент қарорида белгиланган фуқароларгагина тарқатилишини айтиб, кам таъминланган оилалар реестрига киритилган, 18 ёшга тўлмаган 4 миллиондан ортиқ болаларга берилишини маълум қилди.

Бундан олдин Ўзбекистонда 1 июндан тиббиёт ходимларининг ойлик маошлари оширилиши, пенсияни пластик картада олувчиларга 1 фоиз қўшимча пул берилиши, хорижда ишлаётган фуқаролар ва уларнинг оила аъзоларига моддий ёрдам кўрсатилиши хабар қилинган.