АҚШнинг Оклахома штати Тафт шаҳрида очиқ осмон остида ўтказилган фестивалдаги отишмада бир киши ҳалок бўлиб, етти киши яраланди. Бу ҳақда Associated Press хабар бермоқда. Отишмани уюштиришда гумонланаётган 26 ёшли эркак қўлга олинди.
Маҳаллий полиция маълумотларига кўра, 39 ёшли аёл ўлдирилган, яна етти киши жароҳатлар олган. Жабрланганлар орасида бир нафар вояга етмаган шахс бор. Хотира кунига бағишланган фестивалда 1,5 минг киши қатнашган. Шаҳарнинг ўзида эса бор-йўғи бир неча юз киши яшайди.
Хотира куни — АҚШда миллий хотирлаш байрами бўлиб, у Америка иштирок этган барча уруш ва қуролли низоларда ҳалок бўлган америкалик ҳарбийлар хотирасига бағишланган.
Эслатиб ўтамиз, АҚШда аввалроқ Ювалд шаҳридаги бошланғич мактабда отишма юз берган эди. Мактабнинг собиқ ўқувчиси, 18 ёшли Салвадор Рамос 19 нафар болани ва икки ўқитувчини отиб ташлади ва қўлга олиниш чоғида ўзи ҳам ҳалок бўлди.
Ҳодисадан кейин Жамоат хавфсизлиги бўйича Техас департаменти директори, полковник Стивен Маккроу маълум қилишича, полициячиларга раҳбарлик қилган полиция бўлими бошлиғи Рамос бино ичида баррикада қуриб олгани ва энди болалар хавф остида эмаслигини таъкидлаган. Шу сабабли у полициячиларга шиддатли ҳужумга тайёрланиш учун вақт беришга қарор қилган. Маккроу ушбу қарорни нотўғри деб ҳисоблайди. Ҳолат бўйича текширув АҚШ Адлия вазирлиги томонидан бошлаб юборилди.
Изоҳ (0)