Andijonda infokioskdan pul o‘g‘irlagan shaxslarga sud hukmi o‘qildi

Andijon shahridagi infokiosklarni buzib, undagi pullarni o‘g‘irlagan shaxslarga sud hukmi o‘qildi. Bu haqda “Daryo”ga Andijon viloyat sudi xabar bermoqda.

“‘Latin’ kafesida do‘stlarim bilan birga o‘tirib, ozgina spirtli ichimlik ichdik. Uyga ketish uchun taksiga o‘tirganimizda soat kechki 12 dan oshgandi. Tanishlar Navoiy shoh ko‘chasidagi ‘555’ nomli do‘kon oldida tushib qoldik. U yerdagi infokioskni ko‘rib, uning ichidagi pullarini olishga harakat qildik, ammo ocholmadik. Hafsalamiz pir bo‘lib ketayotganimizda yo‘limizda yana bir infokioskka ko‘zimiz tushdi. Shunda apparatni tagidan bo‘shatish uchun yaqin oradagi yerosti yo‘liga olib tushib, buzdik. Ichida to‘rt million so‘mga yaqin pul bor ekan. Pulni olib, bo‘lishdik va bankomatni o‘sha yerda qoldirdik”, — deydi sudlanuvchi. E.I,

Qo‘shimcha qilishicha, oradan bir yarim oy o‘tib, ular yana sheriklari bilan birga Andijon shahridagi “Mustaqillikning20 yilligi” mahallasiga o‘rnatilgan infokioskni o‘g‘irlab, Xo‘jaobod tumaniga ketish yo‘nalishidagi dala maydonida uni ochib, ichidagi 668 ming so‘mni olgan.

Sud hukmi bilan E.I. Jinoyat kodeksining 169-moddasi 3-qismi “a” (juda ko‘p miqdorda o‘g‘rilik) bandida nazarda tutilgan jinoyatni sodir etganlikda aybli deb topilib, unga nisbatan besh yil ozodlikdan mahrum qilish jazosi tayinlangan. Qolgan sudlanuvchilar Jinoyat kodeksining 169-moddasi 2-qismi “v” (ko‘p miqdorda o‘g‘rilik) bilan aybli topilib, M.M.ga 3 yil 6 oy, X.A. va M.A.ga 3 yil muddatga ozodlikdan mahrum qilish, M.Q. ga esa 4 yil muddatga ozodlikni cheklash jazosi tayinlangan.