Андижонда инфокиоскдан пул ўғирлаган шахсларга суд ҳукми ўқилди

Андижон шаҳридаги инфокиоскларни бузиб, ундаги пулларни ўғирлаган шахсларга суд ҳукми ўқилди. Бу ҳақда «Дарё»га Андижон вилоят суди хабар бермоқда.

«‘Латин’ кафесида дўстларим билан бирга ўтириб, озгина спиртли ичимлик ичдик. Уйга кетиш учун таксига ўтирганимизда соат кечки 12 дан ошганди. Танишлар Навоий шоҳ кўчасидаги ‘555’ номли дўкон олдида тушиб қолдик. У ердаги инфокиоскни кўриб, унинг ичидаги пулларини олишга ҳаракат қилдик, аммо очолмадик. Ҳафсаламиз пир бўлиб кетаётганимизда йўлимизда яна бир инфокиоскка кўзимиз тушди. Шунда аппаратни тагидан бўшатиш учун яқин орадаги ерости йўлига олиб тушиб, буздик. Ичида тўрт миллион сўмга яқин пул бор экан. Пулни олиб, бўлишдик ва банкоматни ўша ерда қолдирдик», — дейди судланувчи. Э.И,

Қўшимча қилишича, орадан бир ярим ой ўтиб, улар яна шериклари билан бирга Андижон шаҳридаги «Мустақилликнинг20 йиллиги» маҳалласига ўрнатилган инфокиоскни ўғирлаб, Хўжаобод туманига кетиш йўналишидаги дала майдонида уни очиб, ичидаги 668 минг сўмни олган.

Суд ҳукми билан Э.И. Жиноят кодексининг 169-моддаси 3-қисми «а» (жуда кўп миқдорда ўғрилик) бандида назарда тутилган жиноятни содир этганликда айбли деб топилиб, унга нисбатан беш йил озодликдан маҳрум қилиш жазоси тайинланган. Қолган судланувчилар Жиноят кодексининг 169-моддаси 2-қисми «в» (кўп миқдорда ўғрилик) билан айбли топилиб, М.М.га 3 йил 6 ой, Х.А. ва М.А.га 3 йил муддатга озодликдан маҳрум қилиш, М.Қ. га эса 4 йил муддатга озодликни чеклаш жазоси тайинланган.