Ijtimoiy tarmoqlarda Andijon viloyati Qo‘rg‘ontepa tumanida ko‘richakka gumonlanib operatsiya qilingan ayol vafot etgani haqida xabar tarqaldi. Viloyat prokuraturasi holatga munosabat bildirdi.
Aniqlanishicha, Qo‘rg‘ontepa tumani “Qo‘shtepa” MFY Mustaqillik ko‘chasida yashagan fuqaro D.O. 26-aprel kuni tuman tez tibbiy yordam bo‘limiga o‘tkir appenditsit tashxisi bilan olib kelingan. Shu kuni jarrohlik operatsiya o‘tkazilib, operatsiyadan keyingi holati yaxshilanmagani oqibatida 28-aprel kuni vafot etgan.
Holat yuzasidan fuqaro D.O. ning o‘limi sabablarini aniqlash maqsadida komissiyaviy sud-tibbiy ekspertizasi tayinlangan. Hozirda tergovga qadar tekshiruv o‘tkazilmoqda.
Bundan avval Navoiy prokuraturasi “bitta ukol oqibatida” vafot etgan 36 yoshli ayolning ishi yuzasidan tekshiruv o‘tkazayotgani, Jizzaxda ikki nafar homilador ayol shifokor va hamshira mas’uliyatsizligi sabab vafot etgani, Nukusda patologoanatom tomonidan yorib ko‘rilgan chaqaloq tirik bo‘lib chiqqani haqida xabar berilgan.
Izoh (0)