Ижтимоий тармоқларда Андижон вилояти Қўрғонтепа туманида кўричакка гумонланиб операция қилинган аёл вафот этгани ҳақида хабар тарқалди. Вилоят прокуратураси ҳолатга муносабат билдирди.
Аниқланишича, Қўрғонтепа тумани «Қўштепа» МФЙ Мустақиллик кўчасида яшаган фуқаро Д.О. 26 апрель куни туман тез тиббий ёрдам бўлимига ўткир аппендицит ташхиси билан олиб келинган. Шу куни жарроҳлик операция ўтказилиб, операциядан кейинги ҳолати яхшиланмагани оқибатида 28 апрель куни вафот этган.
Ҳолат юзасидан фуқаро Д.О. нинг ўлими сабабларини аниқлаш мақсадида комиссиявий суд-тиббий экспертизаси тайинланган. Ҳозирда терговга қадар текширув ўтказилмоқда.
Бундан аввал Навоий прокуратураси «битта укол оқибатида» вафот этган 36 ёшли аёлнинг иши юзасидан текширув ўтказаётгани, Жиззахда икки нафар ҳомиладор аёл шифокор ва ҳамшира масъулиятсизлиги сабаб вафот этгани, Нукусда патологоанатом томонидан ёриб кўрилган чақалоқ тирик бўлиб чиққани ҳақида хабар берилган.
Изоҳ (0)