G‘arb davlatlari rossiyalik ishbilarmonlarga Ukrainani tiklash uchun pul o‘tkazish orqali “sanksiyalarni to‘lash” imkoniyatini berishni muhokama qilmoqda. Bu haqda manbalariga tayanib, Associated Press xabar berdi. Manbalarning aytishicha, bu taklif Kanada moliya vaziri o‘rinbosari Xristia Friland tomonidan u o‘z g‘oyasini “rus oligarxlari” bilan muhokama qilganidan so‘ng ilgari surilgan.
AP’ning yozishicha, mazkur taklif G7 mamlakatlari moliya vazirlarining o‘tgan hafta Germaniyada bo‘lib o‘tgan yig‘ilishida e’lon qilingan. Xristia Friland yoshligida Financial Times gazetasining Moskvadagi byurosi boshlig‘i bo‘lib ishlagan va buning sharofati bilan u “ba’zi rus oligarxlari bilan tanish”, deb ta’kidlaydi nashr. Gap aynan kimlar haqida ketayotgani ochiqlanmagan.
Ismini oshkor etmagan manbaning AP agentligiga aytishicha, bu tashabbus allaqachon Ukraina tomoni bilan ham muhokama qilingan. “Hozircha bu shunchaki g‘oya, ammo G‘arb davlatlari bunga qiziqish bildirmoqda”, — dedi agentlik suhbatdoshi.
Ishbilarmonlar Rossiya harbiylarining Ukrainaga bostirib kirishiga javoban joriy qilingan sanksiyalar ostida. Sanksiyalar doirasida Yevropa Ittifoqi rossiyaliklarning 10 milliard yevrolik aktivlarini muzlatib qo‘ygan. Bu summaga muzlatilgan ko‘chmas mulk, qimmatli qog‘ozlar, yaxtalar va avtomobillar qiymati kiradi. YI, shuningdek, Rossiya Federatsiyasi Markaziy bankining 23 milliard yevrolik aktivlarini muzlatib qo‘ygan. Yevropa diplomatiyasi rahbari Jozep Borrel bu aktivlarni Ukraina foydasiga yo‘naltirishni taklif qilgandi. AQSH Kongressi esa Rossiyaning musodara qilingan aktivlarini Ukraina foydasiga yo‘naltirish to‘g‘risidagi qonun loyihasini ma’qullagan.
Izoh (0)