Istanbul politsiyasi maxfiy xalqaro operatsiya o‘tkazib, uning davomida IShIDning yangi rahbari Abu Hasan al-Qurayshiyni qo‘lga olishga muvaffaq bo‘ldi. Turkiyaning Oda TV portali xabariga ko‘ra, shu tariqa tashkilotga oid muhim ma’lumotlar qo‘lga kiritilgan.
Portal ma’lumotlariga ko‘ra, Turkiya politsiyasi o‘tgan hafta IShIDning yangi yetakchisi Istanbulda ekanidan xabar topib, bir necha kun davomida u yashagan joyni kuzatgan. Istanbul razvedka va terrorizmga qarshi kurash boshqarmasi guruhlari tomonidan Abu Hasan al-Qurayshiyni qo‘lga olish bo‘yicha xalqaro operatsiya o‘tkazilgan. Unga Istanbul politsiyasi boshlig‘i Zafer Aktash boshchilik qilgan.
Hibsga olingandan so‘ng IShID yetakchisi terrorizmga qarshi kurash xizmati va milliy razvedka tashkiloti ekspertlari guruhlari tomonidan so‘roqqa tutilgan. Turkiya prezidenti Rajab Toyyib Erdo‘g‘on yaqin kunlarda operatsiya tafsilotlarini e’lon qiladi, deb yozmoqda portal.
IShIDning so‘nggi rahbari Abu Ibrohim al-Hoshimiy al-Qurayshiy 2022-yil 3-fevralda o‘ldirilgan edi. U mahbusning akasi bo‘lgan.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)