OAV: Jonson Zelenskiyga Rossiyaga qarshi yangi xalqaro alyans tuzishni taklif qildi

Buyuk Britaniya bosh vaziri Boris Jonson Yevropa ittifoqi muqobiliga aylanuvchi siyosiy, iqtisodiy va harbiy alyans tuzishni taklif qildi. Bu haqda Italiyaning Corriere della Sera gazetasi o‘z manbalariga tayanib ma’lum qildi, deb yozadi “RBK”.

Jonson o‘z g‘oyasini birinchi marta Ukraina prezidenti Vladimir Zelenskiy bilan 9-aprel kuni Kiyevda bo‘lib o‘tgan uchrashuvda aytgan. Britaniya bosh vaziri fikricha, alyansga Yevroittifoq siyosatidan, shuningdek, Germaniyaning Rossiya “harbiy tajovuzi”ga javobidan norozi bo‘lgan mamlakatlarni birlashtiradi. Alyansga Buyuk Britaniya rahbarlik qiladi, shuningdek, unga Ukraina, Polsha, Estoniya, Latviya va Litva, keyinroq Turkiya ham kirishi kerak.

Manbalarga ko‘ra, bu “milliy suverenitetni jonkuyarlik bilan himoya qiladigan”, iqtisodiyotga liberal yondashadigan va “Moskva tomonidan harbiy tahdidga nisbatan maksimal murosasiz pozitsiyani ko‘rsatish qat’iyatiga to‘la” davlatlar ittifoqi bo‘ladi.

London va Kiyev muzokaralari davom etmoqda: Ukraina hukumati bu g‘oyaga nisbatan aniq bir pozitsiyasini bildirgani yo‘q, ammo uni rad etgani ham yo‘q. Gazeta ma’lumotlariga ko‘ra, Zelenskiy 23-iyun kuni bo‘lib o‘tadigan Yevroittifoq sammitini kutmoqda, unda ishtirokchilar Ukrainaning tashkilotga a’zo bo‘lish haqidagi arizasini muhokama qiladi. Kiyev uchrashuv yakunlariga ko‘ra Yevroittifoq a’zolisiga nomzod maqomini qo‘lga kiritishga umid qilmoqda.

2014-yilda Ukraina va Yevroittifoq assotsiatsiya haqida bitim imzolagan. Ukrainaning Yevroittifoqqa intilishi 2019-yildan buyon mamlakat Konstitutsiyasiga qayd etib qo‘yilgan. 28-fevral kuni, Rossiya harbiy operatsiyasidan bir necha kun o‘tib, Ukraina prezidenti Vladimir Zelenskiy mamlakatning Yevroittifoqqa kirishi haqidagi arizani imzoladi va uni “zudlik bilan” ma’qullashni so‘radi.