Belarus qurolli kuchlarida yangi, janubiy yo‘nalishda tezkor qo‘mondonlik tuziladi. Bu haqda mamlakat prezidenti Aleksandr Lukashenko ma’lum qildi, deb yozadi “RBK”.
Lukashenkoning aniqlik kiritishicha, Minsk Polsha, Litva va Latviya tomonidan, xususan, u yerga joylashtirilgan NATO qo‘shinlari yordamidagi bosimlarni kutmoqda, shuningdek, bosimlar Ukrainadagi jangovar harakatlar kuchayishini qo‘llab-quvvatlash hisobidan ham bo‘lishi mumkin. “Afsuski, yangi yo‘nalish ochildi, ya’ni bizda aytiladiganidek, yangi front ochildi va bizning bunga diqqat qaratmasdan ilojimiz yo‘q”, — dedi prezident.
Uning so‘zlariga ko‘ra, unga o‘tgan yildayoq janubiy yo‘nalishda yangi tezkor qo‘mondonlik tuzishni taklif qilgan, ammo o‘zgarib borayotgan vaziyat Minskni tuzilma “zudlik bilan” yaratilishi kerak, degan fikrga undagan. Qo‘mondonlik g‘arbiy va shimoli-g‘arbiy yo‘nalishlardagi tezkor qo‘mondonliklar bilan birga faoliyat olib boradi.
“Ammo hali uni yaratishga ulgurmasdan, biz bugun tezda, yo‘l-yo‘lakay janubiy chegaralarimiz himoyasini mashq qilishga majburmiz”, — dedi Lukashenko. Uning qo‘shimcha qilishicha, hozir qurolli kuchlar rotatsiyasi bormoqda — taktik guruhlar batalyonlari va boshqa qismlar Belarus janubiga yo‘naltirilgan.
“Biz bu rotatsiyani o‘tkazishimiz kerak, bu mening qat’iy talabim, va shu orqali harbiylarimizni chiniqtirishimiz kerak. Bu harbiy davr sharoitlari, ammo hozircha urushsiz”, — deya qayd etdi prezident.
4-may kuni Belarus armiyasida javob kuchlarini kutilmaganda tekshirish boshlandi, uning doirasida shaxsiy tarkibning ehtimoliy inqirozli vaziyatlar yuzaga kelishiga tezkorlik bilan javob qaytarishga shayligi va imkoniyati baholanishi aytildi.
Shuningdek, ushbu tadbirlar o‘quv mashg‘ulotlari bo‘lib, boshqa mamlakatlar uchun xavf tug‘dirmasligi ta’kidlandi. “G‘arb tinch uxlashi mumkin”, — degandi Lukashenko.
Tekshiruv bir nechta bosqichlarda amalga oshirilmoqda. Ikkinchisi 10-may kuni, keyingisi 23-may kuni boshlandi. Qurolli kuchlar, xususan, qurol-yarog‘ni, harbiy qismlarda uzoq vaqt saqlanadigan jangovar va maxsus texnikani tekshirmoqda.
Mavzuga doir:
Izoh (0)