Qirg‘izistonda “Rossiya 24”, “Rossiya Kultura” va “Zvezda” telekanallari vaqtinchalik translyatsiya qilinmayapti, deb yozadi “RBK” mahalliy “Aknet” teleprovayderiga tayanib.
Uzatish to‘xtatib qo‘yilishi sababi sifatida “qator mamlakatlarda umumrossiya telekanallari tarqatilishi bo‘yicha qonuniy cheklovlar” qabul qilinishi tufayli ularni uzatish “xalqaro sun’iy yo‘ldoshlarda bir tomonlama tartibda bloklab qo‘yilgani” aytildi.
“Ayni paytda signalni barqaror uzatish uchun zaxira translyatsiyasini tashkil qilish bo‘yicha ishlar olib borilmoqda. Telekanallar operatori tomonidagi ishlar yakunlanishi bilan, bizning tarmoq orqali uzatish tiklanadi”, — deyiladi provayder xabarida.
Turkmanistonda ham Rossiyaning “Rossiya 1” va “Zvezda” telekanallari translyatsiyasi bloklandi. Ushbu kanallar yoqilganida chiqayotgan e’longa ko‘ra, xorijiy sun’iy yo‘ldoshlardan umumrossiya telekanallari translyatsiyasi bo‘yicha cheklovlar tufayli telekanal translyatsiyasi bloklangan. Zaxira translyatsiyasini tashkillashtirib, tez orada uzatishni qayta tiklashga va’da berildi.
VGTRK (Umumrossiya davlat televizion va radiouzatuv kompaniyasi)ga qarshi sanksiyalarni may oyi boshida Buyuk Britaniya e’lon qilgan edi. Nafaqat davlat mediaxoldingining o‘zi, balki jurnalistlar ham cheklovlarga uchradi. Shundan keyin Rossiya TIV Britaniya elchisini chaqirib, norozilik bildirdi va javob choralari ko‘rishga va’da berdi.
Urush boshlanganidan keyin, shuningdek, Yevroittifoq, Avstraliya va boshqa mamlakatlar ham ularga qarshi sanksiyalar kiritdi. AQSHda Birinchi kanal, “Rossiya-1” va NTV sanksiyaga uchradi. Sanksiyalar tufayli sun’iy yo‘ldoshlar egalari bir tomonlama tartibda ushbu telekanallar uzatilishini o‘chirib qo‘ya boshladi.
Izoh (0)