Rossiya prezidenti Vladimir Putin Ukrainaning Xerson va Zaporojye viloyatlari aholisini Rossiya fuqaroligiga soddalashtirilgan tartibda qabul qilish to‘g‘risidagi farmonni imzoladi. Hujjat huquqiy axborotning rasmiy portalida e’lon qilingan.
Yangi farmonga ko‘ra, 2019-yilning aprelida qabul qilingan hujjat matniga o‘zgartirishlar kiritiladi. O‘sha hujjatda Rossiya hukumati Donetsk va Lugansk Xalq Respublikalari aholisi uchun Rossiya fuqaroligini olishni soddalashtirgan edi. Xususan, ushbu hududlarda yashovchi fuqarolarning fuqarolikni olish to‘g‘risidagi arizalari uch oydan ortiq bo‘lmagan muddatda ko‘rib chiqilishi nazarda tutilgan.
Endilikda hujjatga quyidagi tartibda o‘zgartirish kiritilgan: “DXR, LXR, Ukrainaning Zaporojye viloyati yoki Xerson viloyati hududida doimiy yashovchi Ukraina, DXR yoki LXR fuqarolari… 2002-yil 31-maydagi 62-FZ-sonli ‘Rossiya Federatsiyasi fuqaroligi to‘g‘risida’gi Federal qonunining 14-moddasi sakkizinchi qismiga muvofiq Rossiya Federatsiyasi fuqaroligini soddalashtirilgan tartibda olish uchun ariza topshirish huquqiga ega”.
Hujjatdagi ushbu o‘zgartirishlar kuchga kirdi, deb yozmoqda Meduza.
Rossiyaning Ukrainaga bosqini boshlangandan keyin Zaporojye va Xerson viloyatlari rus qo‘shinlari nazoratiga o‘tdi. Avvalroq bu viloyatlarning “yangi ma’muriyatlari” vakillari Rossiya tarkibiga kirish istagini bildirgan edi. O‘z navbatida, Rossiya hukumati hududlarning “rus oilasida munosib o‘rin egallashiga” va’da bergan.
Izoh (0)