Россия президенти Владимир Путин Украинанинг Херсон ва Запорожье вилоятлари аҳолисини Россия фуқаролигига соддалаштирилган тартибда қабул қилиш тўғрисидаги фармонни имзолади. Ҳужжат ҳуқуқий ахборотнинг расмий порталида эълон қилинган.
Янги фармонга кўра, 2019 йилнинг апрелида қабул қилинган ҳужжат матнига ўзгартиришлар киритилади. Ўша ҳужжатда Россия ҳукумати Донецк ва Луганск Халқ Республикалари аҳолиси учун Россия фуқаролигини олишни соддалаштирган эди. Хусусан, ушбу ҳудудларда яшовчи фуқароларнинг фуқароликни олиш тўғрисидаги аризалари уч ойдан ортиқ бўлмаган муддатда кўриб чиқилиши назарда тутилган.
Эндиликда ҳужжатга қуйидаги тартибда ўзгартириш киритилган: «ДХР, ЛХР, Украинанинг Запорожье вилояти ёки Херсон вилояти ҳудудида доимий яшовчи Украина, ДХР ёки ЛХР фуқаролари… 2002 йил 31 майдаги 62-ФЗ-сонли ‘Россия Федерацияси фуқаролиги тўғрисида’ги Федерал қонунининг 14-моддаси саккизинчи қисмига мувофиқ Россия Федерацияси фуқаролигини соддалаштирилган тартибда олиш учун ариза топшириш ҳуқуқига эга».
Ҳужжатдаги ушбу ўзгартиришлар кучга кирди, деб ёзмоқда Meduza.
Россиянинг Украинага босқини бошлангандан кейин Запорожье ва Херсон вилоятлари рус қўшинлари назоратига ўтди. Аввалроқ бу вилоятларнинг «янги маъмуриятлари» вакиллари Россия таркибига кириш истагини билдирган эди. Ўз навбатида, Россия ҳукумати ҳудудларнинг «рус оиласида муносиб ўрин эгаллашига» ваъда берган.
Изоҳ (0)