Toshkent xalqaro aeroportida yo‘lovchilarga reysga ro‘yxatdan o‘tish, bojxona va pasport nazorati, shuningdek, parvoz oldidan tekshiruvlardan navbatsiz o‘tish imkonini beruvchi Fast-track xizmati ishga tushirildi. Bu haqda Uzbekistan Airports matbuot xizmati xabar berdi.
Fast-track xizmatidan foydalanish uchun yo‘lovchi jo‘nash terminalidagi ma’lumot burchagiga murojaat qilishi kerak. To‘lov amalga oshirilganidan so‘ng aeroport xodimi yo‘lovchini maxsus “koridor” bo‘ylab “steril” zonagacha kuzatib boradi va u yerdan yo‘lovchi mustaqil ravishda bortga chiqadi.
Fast-track xizmatining narxi 170 ming so‘m. Shuningdek, oila a’zolari bilan uchayotgan yo‘lovchilar uchun “Oilaviy” paketi mavjud.
“Siz milliy valyutada naqd pulda yoki Uzcard, Humo, Visa, Mastercard va boshqalar orqali bank o‘tkazmasi orqali to‘lash imkoniyatiga ham egasiz. Shuningdek, Toshkent aeroportidan uchayotgan yo‘lovchilar Fast-track xizmati bilan bir qatorda jo‘nab ketish terminalining steril hududida joylashgan Anor biznes komfort zalida kutish xizmatini ham xarid qilishlari mumkin”, — deyiladi xabarda.
Avvalroq Davlat bojxona qo‘mitasi 2022-yil 1-iyulga qadar masofadan turib onlayn ravishda transport vositalari navbatlarini shakllantirish imkonini beruvchi “Elektron navbat” va jismoniy shaxslar uchun Fast-track avtomatlashtirilgan axborot tizimlari amaliyotga joriy etishi mumkinligi to‘g‘risida xabar berilgandi.
Izoh (0)