Farg‘onada o‘quvchi qiz o‘qituvchidan tanbeh eshitgach sinf derazasidan sakradi (video)

Ijtimoiy tarmoqlarda Farg‘onada o‘qituvchidan gap eshitgan o‘quvchi qiz derazadan sakrab, sinf xonasidan chiqib ketgani tasvirlangan video tarqaldi. Farg‘ona viloyati xalq ta’limi boshqarmasi holatga munosabat bildirib, vaziyat nazoratga olinganini ma’lum qildi.

Ma’lum qilinishicha, ijtimoiy tarmoqlarda muhokamalarga sabab bo‘lgan mazkur holat 23-may kuni Farg‘ona viloyati Qo‘shtepa tumanidagi 22-maktabda sodir bo‘lgan. Maktabning 8-sinf o‘quvchisi A.A. dars paytida kalitni uyiga tashlab kelish uchun ruxsat so‘ragan, o‘qituvchi esa dars tugashiga 5 daqiqa qolganini aytgan.

Biroq o‘quvchi o‘qituvchining gapiga quloq solmasdan derazadan sakrab, qochib ketgan. Shundan so‘ng o‘qituvchi uni qayta sinfxonasiga olib kirib, tanbeh bergan, ammo o‘quvchi qiz yana derazadan qochib ketgan.

Holat A.A.ning sinifdoshi tomonidan telefonda tasvirga olinib tarqatilgan. “O‘quvchi sog‘-salomat hech qanday tan jarohati olmaganini ma’lum qilamiz. Mazkur xabar viloyat Xalq ta’limi boshqarmasi rahbariyati tomonidan nazoratga olingan”, — deyiladi munosabatda.

Bundan avval Andijonda o‘qituvchisini haqorat qilgan o‘quvchi kaltaklangani, Buxoroda maktab direktori o‘quvchi qizni kaltaklagani, Sirdaryoda o‘qituvchi va maktab direktori o‘rinbosarini kaltaklagan shaxslarga 3 sutka qamoq jazosi tayinlangani xabar qilingandi.