Jahon sog‘liqni saqlash tashkilotining (JSST) amaldagi rahbari Tedros Adxanom Gebreyesus keyingi besh yillik muddatga qayta saylandi, deb xabar bermoqda Reuters.
Ovoz berish shu kunlarda Jenevada o‘tkazilayotgan Jahon sog‘liqni saqlash assambleyasi doirasida bo‘lib o‘tgan. Saylov jarayoni 2021-yilning aprel oyida, JSSTga a’zo davlatlarning tashkilot bosh direktori lavozimiga nomzod taklif qilishi bilan boshlangan edi. Yanvardagi yig‘ilishda JSST ijroiya kengashi bu lavozimga yagona da’vogar bo‘lgan Tedros Adxanom Gebreyesusning nomzodini ilgari surdi.
Qayta saylangach assambleyaga murojaat qilar ekan, Gebreyesus JSST favqulodda vaziyatlarga tayyorgarlik ko‘rish va tashkiliy takomillashtirishga e’tibor qaratishini aytdi. JSST Bosh direktori pandemiya davrida “har tarafdan” tanqid eshitish oson bo‘lmaganini tan oldi, lekin u va uning hamkasblari buni konstruktiv qabul qilib, ishlashda davom etganini ta’kidladi.
Gebreyesusning yangi vakolat muddati 16-avgustdan boshlanadi. Qoidalarga ko‘ra, JSST Bosh direktori faqat bir marta qayta saylanishi mumkin.
Avvalroq JSST bosh direktori ko‘plab mamlakatlarda koronavirusga qarshi cheklovlar olib tashlangani pandemiya tugaganini anglatmasligini eslatgandi.
Izoh (0)