Xorazm viloyatida 14 mlrd so‘mga yaqin budjet mablag‘lari maqsadsiz sarflangani aniqlandi

Korrupsiyaga qarshi kurashish hududiy kengashlarining reyting baholash natijalariga ko‘ra, Xorazm viloyatida budjet mablag‘laridan noqonuniy foydalanish holatlari bo‘yicha mart oyida 16 ta nazorat obyektida 13 milliard 962 million so‘m mablag‘lar maqsadsiz sarflangani aniqlanib, respublika miqyosida eng yomon natijani qayd etgan. Bu haqda Korrupsiyaga qarshi kurashish agentligi xabar berdi.

Viloyat Korrupsiyaga qarshi kurashish hududiy kengashining navbatdagi yig‘ilishida shu kabi korrupsiyaviy holatlar Korrupsiyaga qarshi kurashish agentligi rahbariyati, Milliy kengash a’zolari, mutasaddi vazirlik va idoralar vakillari hamda Hududiy kengash a’zolari ishtirokida atroflicha muhokama etilgan. Xususan, energetika tizimida uchrayotgan korrupsiyaviy jinoyatlar tahlili, shuningdek, ushbu tizimda korrupsiyaning oldini olish bo‘yicha amalga oshirilgan ishlar yuzasidan mas’ullarning axboroti eshitilgan.

Qayd etilishicha, 2021-yilda respublikada energetika tizimida faoliyat yuritgan 94 nafar shaxsga nisbatan oid 63 ta korrupsiyaga oid jinoyat ishi sudlarga yuborilgan. Mazkur jinoyatlarni sodir etganlarning 91 nafari tuman va shahar, 3 nafari esa viloyat darajasidagi mansabdor shaxslar bo‘lib, ular tomonidan davlat va jamiyat manfaatlariga jami 11,5 milliard so‘m zarar yetkazilgan. Viloyatda bunday jinoyatlarning 3 tasi “Xorazm hududiy elektr tarmoqlari” AJ xodimlari tomonidan sodir etilgan.

Avvalroq Antikorrupsiya agentligi ochiqlikka oid qonunchilik talablariga rioya etmagan 8 ta mahalliy hokimlikka ogohlantirish yuborgani to‘g‘risida xabar berilgandi.