Farg‘ona viloyatining Uchko‘prik hamda Toshkent viloyatining Yuqori Chirchiq tumanlarida tabiiy gaz tarmog‘iga noqonuniy ulanish holatlari aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Uchko‘prik tuman bo‘limi tomonidan tergovga qadar tekshiruv o‘tkazilgan. Tekshiruv davomida fuqaro S.U. O‘zbekiston tumani “Mingtut” MFY hududida ohak ishlab chiqarishga ixtisoslashtirilgan yashirin sex tashkil qilib, tabiiy gaz tarmog‘iga o‘zboshimchalik bilan ulangani aniqlangan. Sex faoliyati natijasida davlat va jamiyat manfaatlariga 650,8 million so‘m zarar yetkazgan.
Shuningdek, Yuqori Chirchiq tuman bo‘limi tomonidan o‘tkazilgan tergovga qadar tekshiruvda, fuqaro K.T. o‘ziga tegishli bo‘lgan noturar binoda tashkil qilingan issiqxonani tabiiy gaz tarmog‘iga o‘zboshimchalik bilan ulab, tabiiy gazdan noqonuniy foydalangani oqibatida davlat va jamiyat manfaatlariga 74,7 million so‘m zarar yetkazilganligi aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Marg‘ilonda qo‘lbola gaz yondirgichlar orqali ohak ishlab chiqarish bilan shug‘ullangan yashirin sex aniqlangan edi.
Izoh (0)