Toshkent aholisi jamoat joylarida, xususan, ko‘chada tamaki chekkani uchun jarimaga tortilayotgani to‘g‘risida xabar berilgandi. UzNews nashrining poytaxt IIBBga tayanib yozishicha, 2022-yilning to‘rt oyi davomida jamoat joyida tamaki chekkan 12 mingdan ortiq fuqaro javobgarlikka tortilgan.
“Odatda birinchi marta huquqbuzarlik sodir etgan shaxslar rasmiy ogohlantiriladi. Raqamlarga to‘xtalsak, 2022-yilning 4 oyi davomida Toshkent shahrida jamoat joyida tamaki mahsulotlarini iste’mol qilgan 12 127 nafar fuqaro ma’muriy javobgarlikka tortilgan. Bundan deyarli 3 baravar ko‘p shaxslar rasmiy ogohlantirilgan.
Fuqarolarimizdan, o‘zlarining va atrofdagilarning sog‘lig‘iga befarq bo‘lmasliklarini hamda qonunchilik normalariga rioya etishlarini so‘raymiz”, — deyiladi Toshkent shahar IIBB axborot xizmati xabarida.
Ma’muriy javobgarlik to‘g‘risidagi kodeksning 56-1-moddasiga ko‘ra (ish joylarida, sog‘liqni saqlash, ta’lim, sport-sog‘lomlashtirish muassasalarida, yong‘in chiqish xavfi bo‘lgan joylarda, shu jumladan, avtomobillarga yonilg‘i quyish shoxobchalarida va boshqa jamoat joylarida tamaki mahsulotini iste’mol qilish, bundan tamaki mahsulotini iste’mol qilish uchun maxsus ajratilgan joylar va (yoki) xonalar mustasno) bazaviy hisoblash miqdorining uchdan bir qismi miqdorida jarima (90 ming so‘m) solishga sabab bo‘ladi.
Izoh (0)